«Հանրապետական կուսակցությունը նորից Հայաստանը գնեց, ու քաղաքացիների զգալի մի հատված իրեն վաճառեց. խայտառակ ընտրություններ էին»: Այսօր «Հայացք» ակումբում նման կարծիք հայտնեց ՀԱԿ կենտրոնական գրասենյակի անդամ Արշակ Բանուչյանը:
ԲՀԿ-ի հետ ՀԱԿ-ի համագործակցության մասին պարոն Բանուչյանն ասաց, որ գուցե եւ արդյունքում իրենք քվեներ կորցրին, բայց դրանից ինքը մտահոգություն չունի. «Ու՞ր գնացին այդ ձայները, ընտրության չեկա՞ն, գնացին «Բարգավաճի՞ն» քվե տվեցին: «Բարգավաճ Հայաստանից» խորհրդարան ընկած մարդկանց մի զգալի մասը մտավորականներ են, որոնք ինչ-որ ձեւով կդրսեւորվեն մեր խորհրդարանում»:
Նրա համար ամենամեծ չարիքն այն է, որ ՀՀԿ-ն դարձել է Հայաստանի միահեծան տերը: Պարոն Բանուչյանը, ով մեծամասնական ընտրակարգով առաջադրվել էր, անձամբ դիմելու է Սահմանադրական դատարան՝ արդյունքները բողոքարկելու. «Կան բազմաթիվ արձանագրություններ, փաստեր, որ 11 ընտրատարածքում մասնակցել են ընտրողների ոչ թե 62 տոկոսը, այլ ոչ ավելի՝ քան 42 տոկոսը: Ունեինք տեղամաս, որ 50 քվեաթերթիկ չկար, որտե՞ղ էին դրանք: Հիմքեր կան վիճարկելու, որ 11 ընտրատարածքում ընտրությունները չեն կայացել: Այդ ինչպե՞ս ստացվեց, որ այդ ընտրատարածքում «Օրինաց երկիր» կուսակցությունը 2454 ձայն հավաքեց, իսկ այդ ընտրատարածքում առաջադրված ՕԵԿ մեծամասնական թեկնածուն՝ 12.000 ձայն»:
ՍԴ որոշումն էլ պարոն Բանուչյանն արդեն կանխորոշել է.«Այս կառույցը վաճառված է ինչպես մյուս կառույցները, բայց բոլոր օրինական ճանապարհները պետք է օգտագործել»:
Կարդացեք նաև
Արփինե ՍԻՄՈՆՅԱՆ
