Հայ ազգային կոնգրեսի առաջնորդ Լևոն Տեր-Պետրոսյանին հարկավոր է իշխանություն, սակայն` ողջ իշխանությունը, այլ ոչ թե դրա մի կտորը: Այդ մասին ԱրմԻնֆոյին հայտարարել է Ռազմավարական և միջազգային հետազոտությունների կենտրոնի (Վաշինգոտ) գիտաշխատող Սերգեյ Մարկեդոնովը` մեկնաբանելով օրերս հանրահավաքում Տեր-Պետրոսյանի հայտարարությունը պատգամավորական մանդատից հրաժարվելու վերաբերյալ:
«Լևոն Տեր-Պետրոսյանը ձգտում է լինել առաջնորդ կամ իշխանությունը մերկացնող, սակայն` ոչ «բանող ձի»: Նա ռացիոնալ չի մտածում, այստեղ շատ է առասպելագործությունը, մեսսիանիզմը», – նշել է վաշինգտոնյան փորձագետը:
Նա ավելացրել է, որ ՀԱԿ-ը տիպիկ «առաջնորդական կուսակցություն» է, ինչպես «Յաբլոկոն» (ժամանակին Յավլինսկու նախագիծն էր) կամ Ռուսաստանի դեմոկրատական կուսակցությունը 1990-ականների սկզբին (մոռացության մատնված Նիկոլայ Տրավկինի նախագիծը): Հանեք այդ առանցքը, և կուսակցություն չկա: Ամեն ինչ սնուցվում է մեկ մարդու հմայքով, այլ ոչ թե կուսակցաշինությամբ կամ գաղափարական հիմքով: «Առանցք` ես նկատի ունեմ առաջնորդի անձը: Իսկ քանի որ կուսակցության հիմքում առաջնորդի անձն է, ապա անխուսափելի է նրա փառաբանումը, պաշտամունքի ձևավորումը, այստեղից էլ մեսսիանիզմն ու ռացիոնալիզմի բացակայությունը»,- նշել է Մարկեդոնովը:
