Այս օրերին ով չի ալարում, հենց միայն «համատարած ընտրակաշառքներից» ու փող բաժանելուց է խոսում։
Հետաքրքիր է միայն, որ այդքան ակտիվիստ ու վստահված անձ, հազարավոր կողմնակիցներ ունենալով հանդերձ, անընդհատ ծամծմվող «համատարածից» անհամեմատ քիչ կոնկրետ կաշառման դեպքեր ու փաստեր են բերվում։ Բայց որոշ քանքարների համար դա խնդիր չէ, որ մաղձոտած վրա տան ու ընդհանրացված հայտարարություններ անեն, թե ժողովուրդն անբարո է, հասարակությունը դեգրադացված է, եւ այլն, եւ այսպես շարունակ։
Լավ, ձեզ ո՞վ է իրավունք տվել նման ընդհանրացված ու վիրավորական արտահայտություններ անել ամբողջ ժողովրդի ու հասարակության հասցեին։ Ի՞նչ ասել է՝ «համատարած ընտրակաշառք»։
Մայիսի 6-ին, ըստ նախնական տվյալների, ընտրությանը մասնակցել է ընտրողների մոտ 62 տոկոսը, շուրջ 1,5 միլիոն մարդ։ Նրանց մոտ 44 տոկոսը քվեարկել է ՀՀԿ-ի օգտին։ Իսկ մնացած 56 տոկոսը՝ այլ ուժերի։ «Համատարածի» դեպքում ստացվում է, որ բոլոր ուժերն ընտրակաշառք են բաժանել, այդ թվում՝ ՀԱԿ-ը, Հայկոմկուսն ու «Ժառանգությունը», բոլո՛րը։
Այսինքն՝ սրանց ասածով, ընտրության բոլոր մասնակիցները, որպես հասարակություն, դեգրադացված են։ Ավելի անհեթեթ բան դժվար է մոգոնել, եթե ավելին չասվի։
Ա. ՀԱԿՈԲՅԱՆ
«Հայոց աշխարհ»
