Շուշիի ազատագրման օրվանից անցել է 20 տարի: Aravot.am-ը ռազմական փորձագետ Արծրուն Հովհաննիսյանից հետաքրքրվեց՝ իրականում ո՞ւմ հաղթանակն էր Շուշիի ազատագրումը: Մեր զրուցակիցը պատասխանեց. «Շուշիի հաղթանակը մեզ համար ճակատագրական է եղել, այն մեր պետության կայացման համար մեծ դերակատարություն ունի: Ինչպես այսօր Ստեփանակերտում կայացած զորահանդեսի ժամանակ ասաց Բակո Սահակյանը, Շուշիի հաղթանակը համայն հայության հաղթանակն է»:
Հետաքրքրվեցինք՝ ռազմական փորձագետն ինչպե°ս կգնահատի այն երևույթը, երբ քաղաքական գործիչներ կամ անհատներ փորձում են ժողովրդի այդ հաղթանակն օգտագործելով միավորներ շահել: Ա. Հովհաննիսյանը նշեց. « Ստորություն է, երբ փորձ է արվում ազգային արժեքները տեղայնացնել, փոքրացնել, յուրացնել»:
Ստեփանակերտում անցկացվող տոնական զորահանդեսի ընթացքում ԼՂՀ նախագահ Բակո Սահակյանի, ՀՀ նախագահ Սերժ Սարգսյանի, Ամենայն հայոց կաթողիկոս Գարեգին Բ-ի և ԼՂՀ բարձրաստիճան պաշտոնյաների կողքին հարթակին նստած էր նաև ՀՀ երկրորդ նախագահ Ռոբերտ Քոչարյանը: Aravot.am-ը Ա. Հովհաննիսյանին խնդրեց մեկնաբանել երկրորդ նախագահի ներկայությունը: Ռազմական փորձագետը նշեց. «Այդպես էլ պիտի լիներ: Չեմ ուզում խորանալ քաղաքական այլ հարցերի մեջ, ուղղակի կարևոր է այն անձանց միությունը, ովքեր այդ Շուշիի ազատագրման ակունքներում են կանգնած: Ես Ռոբերտ Քոչարյանի՝ զորահանդեսին ներկայությունը չեմ կապում նրա՝ քաղաքականություն վերադառնալու հետ, միգուցե ներքաղաքական հարցերով զբաղվող անձինք դրանք կապեն իրար»:
Տաթև ՀԱՐՈՒԹՅՈՒՆՅԱՆ
