Այն մասին, որ Աշոցքում ընտրակաշառքը հասել էր քսան-քսանհինգ հազար դրամի, Aravot.am-ի հետ զրույցում տեղեկացրեց 70-ամյա ՀՀՇ-ական Շալիկո Զորյանը, ով մեծամասնական ընտրակարգով իր թեկնածությունն էր առաջադրել Աշոցքի, Ամասիայի գյուղերն ու Գյումրու կենտրոնը ընդգրկող թիվ 33 ընտրատարածքում ու պայքարում էր ՀՀԿ-ական Աշոտ Աղաբաբյանի ու ՕԵԿ-ական Հովհաննես Մարգարյանի դեմ: « Եվ Աշոցքում, և Ամասիայում, և Ախուրյանի 33-ի մեջ մտնող մի մասում, և Գյումրիում կատարվեց այն, ինչ վերջին տարիներին կատարվել է Հայաստանում: Ավելի կատարելագործված խախտումներով, ավելի խոշոր ընտրակաշառքով, իշխանական ապարատի ավելի կոպիտ և բռնի օգտագործմամբ և ավելի անողոք: Ես զարմանում եմ, որ երկրի ղեկավարը հայտարարում է, թե պիտի կատարվի թափանցիկ, արդար, ժողովրդավարական ընտրություններ , դրված է այստեղ մեր հայրենիքի բախտը, ճակատագիրը, հեղինակությունը, և կողքից իր կուսակցության անդամները, անմիջապես իր մարդիկ տնից տուն են մտնում` գյուղապետերով , դպրոցի տնօրեններով հարազատների անձնագրեր են հավաքում, նրանց պատճեներն են վերցնում. մեթոդ, որ վախեցնեն, թե պատճեն վերցրել ենք` ուրիշին պիտի ձայն չտաք: Ընտրակաշառքը վերջին օրերին հասնում էր խոշոր չափերի, որովհետև տեսնում էին, որ կարող են տանուլ տալ», -թիվ 33 ընտրատարածքում կատարված ընտրությունները այսպես էր բնութագրում մեր զրուցակիցը :
Aravot.am-ի ճշտող այն հարցին էլ, թե ինչքա՞ն էր ընտրակաշառքի չափը գյուղերում, մեր զրուցակիցը փոխանեցեց, որ իր լսելով Աշոցքում վերջին 3 օրերին բաժանվել է 20 000-25 000 դրամ: Իսկ ո ՞ ր թեկնածուն ու քաղաքական ուժն էր բաժանողը, դարձյալ հետաքրքրվեցինք մենք: «Եվ Բարգավաճն է բաժանել և Հանրապետականն է բաժանել, և Օրինաց երկիրն է բաժանել, որը կցորդն է Հանրապետականի, Տեր-Պետրոսյանն ասում է կույրաղքիը, ես էլ ավելացնում եմ` բորբոքված կույրաղիքը , այսինքն հանելու ենթակա է, բայց Հանրապետականի չափերն ու շրջանակները սարսափելի էին»,- հիասթափված ու ապշած ասում է նախկին թեկնածուն, որը հավաքել էր ընտրողների ձայների 11 տոկոսը: Նա խնդրեց իր ընտրազանգվածին`3000 հոգուն հասցնել իր խորին երախտագիտությունը, քանի որ նրա հաշվարկներով, այս անձնավորությունները հանուն իրեն հրաժարվել են մոտ 30 միլիոն դրամ ընտրակաշառքից:
Նունե ԱՐԵՎՇԱՏՅԱՆ
