Վարագյանը չի կարողանում վերահաշվարկի հասնել
Շիրակի մարզի ամենաթեժ ընտրատարածքում` Արթիկի ու Մարալիկի տարածաշրջանն ընդգրկող թիվ 36-ում, պարտված ՀՀԿ-ական թեկնածուն` Մխիթար Վարագյանը, բողոք է ներկայացրել ընտրատարածքային ընտրական հանձնաժողով` պահանջելով թվով 12 ընտրատեղամասերում վերահաշավարկ կատարել:
Սակայն, ինչպես Aravot.am-ին ներկայացրեց Արթիկի փոխքաղաքապետը` Գևորգ Փթուկյանը, ով թեկնածուի նախընտրական շտաբի պետն էր, այսօր առավոտյան հանձնաժողովը ընդամենը մեկ ընտրատեղամասի արդյունքները վերահաշվարկելուց հետո դադարեցրել է գործընթացը: Պարոն Փթուկյանը մեզ վստահեցրեց, որ ակնհայտ խախտումներ են տեղի ունեցել, այդ պատճառով էլ թեկնածուն բողոքարկել է, սակայն վերահաշվարկը սկսվելուն պես տարաձայնություններն են եղել իրենց վստահված անձի և հանձնաժողովականների մեջ, և վերահաշվարկը դադարեցվել է: Մենք այս թեմայով պարզաբանումներ խնդրեցինք թիվ 36 ընտրատարածքային ընտրական հանձնաժողովի նախագահ Աշոտ Մարտիրոսյանից, ով փոխանցեց, որ վերահաշվարկ չի կատարվելու, քանի որ խախտվել է Ընտրական օրենսգրքի 48 հոդվածի պահանջները:Նրա մեկնաբանմամբ, Վարագյանը կամ նրա վստահված անձը ընտրական գործընթացի ավարտին որևէ բողոք, դիտողություն չի ներկայացրել տվյալ ընտրատեղամասի հանձնաժողովին, գրանցամատյանում չկա արձագրված ոչինչ, այդ պատճառով էլ հիմա իրավունք չունի բողոքելու: Ընտրական օրենսգրքի Հոդված 48-ում, որը կոչվում է Քվեարկության արդյունքների վերահաշվարկը, սահմանված է. « Թեկնածուն, վստահված անձը, եթե ներկա են եղել ընտրական տեղամասում քվեարկության արդյունքների ամփոփմանը, ինչպես նաև տեղամասային ընտրական հանձնաժողովի անդամը` ընտրական տեղամասում քվեարկության արդյունքների վերաբերյալ արձանագրությունում քվեարկության արդյունքների ամփոփման կարգի վերաբերյալ հատուկ կարծիք ունենալու մասին գրառում կատարելու դեպքում, իրավունք ունեն սույն օրենսգրքով սահմանված կարգով և ժամկետներում բողոքարկելու տվյալ ընտրական տեղամասում քվեարկության արդյունքները`ընտրատարածքային ընտրական հանձնաժողով ներկայացնելով ընտրականտեղամասում քվեարկության արդյունքների վերահաշվարկի մասին դիմում»:
Ստացվում է, որ պարոն Վարագյանը ուզի, թե չուզի, ստիպված է ընդունել ԲՀԿ-ական թեկնածուի` Մուշեղ Պետոյանի հաղթանակը, ով 4500 ձայնով իրենից առաջ է անցել: Հիշեցնենք, որ այս ընտրատարածքում պատգամավոր դառնալու համար պայքարում էին ՀՀԿ-ական պատգամավոր Մխիթար Վարագյանը, ԲՀԿ-ական պատգամավոր Մուշեղ Պետոյանը , Մեղրաշենի ՕԵԿ-ական գյուղապետ Հունա Պետրոսյանը, ով Արթիկի ոստիկանապետի եղբայրն է և «Ժողովրդավարական հայրենիք» կուսակցության նախագահ Պետրոս Մակեյանը:
Նունե ԱՐԵՎՇԱՏՅԱՆ
Կարդացեք նաև
