«Իմ կինը 6/02 տեղամասի տեղն էլ չգիտի , բացի դրանից նրա բառապաշարում նման անեծքներ ու խոսկցություններ չեն կարող լինել: Նա իդեալական, բարձր գիտակցության տեր անձնավորություն է: Պարզապես իմ պատճառով երբեմն վատ խոսքեր ու տրամաբանություն են ուղղորդում նաեւ որդիներիս մասին, այս անգամ էլ այլ պրովոկացիա արեցին»,- Aravot.am-ի հետ զրույցում ասաց ՀՀԿ փոխնախագահ Գալուստ Սահակյանը՝ անդրադառնալով լրատվամիջոցներում տեղ գտած հրապարակումներին, թե մայիսի 6-ին նրա կինը 6/02 տեղամասում կոչ է արել քվեարկել ՀՀԿ-ի օգտին ու ԲՀԿ-ական ներկայացուցչի միջամտությունից հետո նրան ասել է ՝«բոյդ թաղեմ» :
Ըստ հրապարակումների, Գ. Սահակյանի կնոջ նման պահվածքից հետո միջամտել էր նաեւ անձամբ պարոն Սահակյանը ու խանգարել ԲՀԿ թեկնածու Վահան Կարապետյանի շտաբի աշխատանքներին:
« Ինչ վերաբերում է միջադեպերին, միջադեպեր շատ են եղել, որոնցվից մեկն էլ դա էր, ինքս, իրոք, միջամտել եմ, շատ կարգին ու հանգիստ, բայց Վահան Կարապետյանին լավ ճանաչում եմ, մտերիմ եմ, դրական գնահատականներ ունեմ: Չեմ կարծում, որ սա էլ կարելի է ասել, որ միջամտել եմ, ոչ թե միջամտել եմ, այլ փորձել եմ հանդարտեցնել, քանի որ, ըստ օրենսդրության, տեղամասերում կուտակումներ չպետք է լինեին, իսկ դա իրոք եղել է 6/02 տեղամասում, պարզապես փորձել են վարկաբեկել ինձ ու կնոջս»:
Արփինե ՍԻՄՈՆՅԱՆ
