Մայիսի 11-ին Մոսկվայի Տրետյակովյան պատկերասրահի Ինժեներական սրահում կմեկնարկի շախմատի աշխարհի թագի համար մրցամարտը, որում աշխարհի գործող չեմպիոն Վիշվանաթան Անանդը (Հնդկաստան) չեմպիոնի տիտղոսը պետք է պաշտպանի հավակնորդ, իսրայելցի գրոսմայստեր Բորիս Գելֆանդի հետ պայքարում:
Շախմատային աշխարհի այս ամենաբարձրակարգ մրցաշարի գլխավոր մրցավարը հայաստանցի միջազգային կարգի մրցավար Աշոտ Վարդապետյանն է: Աշխարհում միջազգային մրցավարները քիչ չեն, սակայն ամեն մեկին չի վստահվում այդ պատվաբեր պարտականությունը: Դրա համար պետք է բավարարել մի ամբողջ շարք պարտադիր պայմաններ, որոնցից ամենագլխավորը երկուսն են: Նախ՝ ՖԻԴԵ-ն պետք է տա իր համաձայնությունը, ապա, եւ սա, թերեւս, ավելի առաջնային է, չեմպիոնն ու հավակնորդը պետք է վստահեն նրան:
«Առավոտը» դեռ անցած տարի տեղեկացրել էր, որ թե Անանդը եւ թե Գելֆանդը միջազգային ֆեդերացիային դիմել էին իրենց դիմակայության սպասարկումը հանձնարարել հայ մասնագետին:
Չեմպիոնն ու հավակնորդը խաղալու են 12 պարտիա: 6:6 հաշվի դեպքում նշանակվում է 25 րոպեանոց չորս պարտիա: Եթե դա էլ ի հայտ չի բերում հաղթողին, մրցակիցները կմրցեն 5 րոպեանոց եւս երկու պարտիայում: Կրկին հավասարության դեպքում կազմակերպվելու է, այսպես կոչված, «Հանկարծակի մահվան« մրցամարտ, որտեղ սպիտակներին տրվելու է 5, սեւերին` 4 րոպե: Եվ եթե դա էլ ավարտվի ոչ-ոքի, սեւերով խաղացող գրոսմայստերը կհռչակվի աշխարհի չեմպիոն:
Կարդացեք նաև
«Առավոտ» օրաթերթ
