Աշխատավարձերի վերանայումից մինչեւ սահմանների ապահովություն
«Առավոտը» դիմեց մեր մշակույթի անվանի գործիչներին՝ հետաքրքրվելով, թե ո՞րն է իրենց ոլորտի թիվ 1 խնդիրը՝ կապված օրենսդրական դաշտի հետ, ինչը նորընտիր պատգամավորները պարտավոր են լուծել առաջին հերթին:
Տիկնիկային թատրոնի տնօրեն Ռուբեն Բաբայանը հարց ուղղեց նորընտիր պատգամավորներին՝ մեր հասարակությանը ընդհանրապես բարձրարվեստ մշակույթ պե՞տք է, թե՞ ոչ:
Կոմպոզիտորների միության նախագահ Ռոբերտ Ամիրխանյանն էլ գտնում է, որ մեզանում կյանքը շարժվում է օրենքներից առաջ, մինչդեռ պատգամավորների խնդիրն է տեղերը փոխել՝ օրենքը բերել առաջ. «Հակառակ դեպքում մեր կյանքն ընդհանրապես, այդ թվում եւ մշակութայինը, կլինի անորոշ վիճակում»: «Բարեկամություն» պարարվեստի պետական անսամբլի գեղարվեստական ղեկավար Նորայր Մեհրաբյանի երազանքն է, որ, ի վերջո, ստեղծվի Մշակութային օրենսգիրք, ինչը կնպաստի տարբեր ոլորտների կարգավորմանը:
Հայաստանի պետական ֆիլհարմոնիկ նվագախմբի տնօրեն Ռուզաննա Սիրունյանը հորդորեց նորընտիր պատգամավորներին թեթեւացնել ոլորտի հարկային դաշտը: Նույն տեսակետին է նաեւ Խամաճիկների թատրոնի ղեկավար Արմեն Էլբակյանը: Նրա խոսքերով՝ պետք է ստեղծվի մի մեխանիզմ, ինչը հնարավորություն կտա մշակույթն աջակցողներին ու ֆինանսավորողներին ազատել հարկերից: Միայն այս դեպքում մշակույթի գործիչը դռնեդուռ չի ընկնի:
Երեւանի կամերային թատրոնի տնօրեն Արա Երնջակյանը ուզում է տեսնել այնպիսի չափորոշիչներ, որով գնահատվում է մշակույթի գործչի կատարած աշխատանքը:
Երեւանի մշակույթի պետական քոլեջի տնօրեն Նադեժդա Սարգսյանը ցանկություն ունի հեղինակային իրավունքները տեսնել պաշտպանված. «Ստացվում է, որ երգիչը ձայնագրում է CD եւ արդյունքում բոլորը, բացի կատարողից, վարձատրվում են»:
«Հովեր» պետական կամերային երգչախմբի գեղարվեստական ղեկավար Սոնա Հովհաննիսյանը ուզում է նորընտիր պատգամավորների առաջին գործը լինի մշակույթի ոլորտի աշխատողների աշխատավարձի վերանայումը:
Հեռուստատեսության եւ ռադիոյի էստրադային-սիմֆոնիկ նվագախմբի գեղարվեստական ղեկավար Երվանդ Երզնկյանը գտնում է, որ օրենսդիր մարմնի գերխնդիրը պետք է լինի մշակույթի տարբեր ոլորտներում ազգայինի առաջնության քաղաքականությունը, ինչը պայմանավորված չէ միայն գումարով:
Օպերային թատրոնի տնօրեն Կամո Հովհաննիսյանը, նշելով, թե մշակույթի խնդիրները 1-2-ը չեն, ասաց. «Եթե ես լինեի պատգամավոր, կաշխատեի այնպիսի օրենքների ստեղծման ուղղությամբ, որոնց շնորհիվ առաջին հերթին էլ ավելի ապահով կլինեին երկրի սահմանները, կզարգանար տնտեսությունը, հետո նոր հանգիստ կանդրադառնայի մշակույթին»:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
