Ամռան պայծառ ու արևոտ օրերը սարերի ետևում չեն: Շատ աղջիկներ մտովի արդեն պատկերացնում են իրենց որևէ ծովափին հանգստանալիս, բայց շատերն էլ ստիպված են լինելու հրաժարվել հաճելի արևայրուքից, խուսափել արևից և փակվել տան չորս պատերի ետևում. պատճառը մաշկային պեպեններն են:
«Արևից դեմքիս պեպենները ակտիվանում, առավել արտահայտիչ են դառնում, այդ պատճառով էլ փորձում եմ պաշտպանվել, խուսափում եմ տանից դուրս գալ, իսկ եթե ստիպված եմ լինում, ապա օգտագործում եմ արևից պաշտպանող քսուքներ»,-ասում է 24-ամյա Սեդան: Սեդայի խոսքով` պեպեններ դեմքին հայտնվել են դեռ փոքր տարիքից, թեև ծնողները դիմել են մաշկաբանի, բայց բուժման երկար սպասված արդյունքները այնքան էլ գոհացուցիչ չեն եղել: «Բուժման ընթացքում աստիճանաբար պեպենները սպիտակեցին, իհարկե ոչ իսպառ, բայց համարյա դարձել էին անտեսանելի»: Սակայն աղջկա հավաստմամբ` երկար ժամանակ չի կարողացել գոհանալ դրական արդյունքներով, բուժումից գրեթե անմիջապես հետո պեպենները աստիճանաբար սկսել են «գրավել» իրենց տեղերը դեմքի վրա: «Հիմա արդեն բուժման մասին չեմ էլ մտածում: Կարծում եմ` պեպենոտ դեմքն էլ կարող է գեղեցիկ լինել»,- ասում է նա:
Ի՞նչ են պեպենները, ո՞րն է դրանց առաջացման պատճառները:
«Պեպենները առաջանում են մաշկի պիգմենտացիոն համակարգի սխալ գործառույթի արդյունքում: Պեպենը կուտակված մելանինն է, որը նորմալ պիգմենտացիայի պարագայում պետք է հավասարաչափ բաշխվի մաշկի տակ` տալով նրան արևայրուքի հաճելի երանգ»,- ասում է մաշկաբան Նինա Այվազյանը: Նրա խոսքով` պեպեններԸ կարող են առաջանալ նաև նյութափոխանակության խանգարումների արդյունքում:
20-ամյա Մարգարիտայի համար փոքր տարիքում պեպենները եղել են բարդութավորման պատճառ: ,Բակում կամ դպրոցում խաղալիս կամ ինչ-որ բան անելիս, երբ ընկերներով վիճում էինք, ինձ հաղթելու համար գոռում էին պեպենոտ: Նրանք լավ գիտեին, որ նման պահերին ձայն չէի հանում, պարզապես լուռ լաց էի լինում.: Աղջիկը վստահեցնում է, որ հիմա այդ օրերը ինքը ժպիտով է հիշում, բայց ներքուստ զգում է իր ապրած պահերի դժվարությունը:
Մաշկաբանի խոսքով` պեպենները հնարավոր է բուժել, բայց բուժումից հետո էլ անընդհատ պետք է խնամել մաշկը, որովհետև դրանք շատ արագ կարող են նորից ի հայտ գալ: ,Լինում են դեպքեր, երբ աղջիկները դեմքի պեպենները ծածկելու համար այնքան քսուքներ են օգտագործում, որ մաշկային այլ խնդիրներ են առաջանում.,- ասում է տիկին Նինան:
Ինչպե՞ս վարվել: Լուծման լավագույն տարբերակը առաջԱրկում է հոգեբան Արևիկ Մազմանյանը. ,Յուրաքանչյուր աղջիկ պետք է գիտակցի, որ աշխարհում բոլոր մարդիկ նույնը չեն՝ թե՜ ներքին աշխարհով, թե՜ արտաքին տվյալներով: Պարզապես նրանք պետք է ընդունեն, որ գուցե իրենց յուրահատկությունն էլ պայմանվորված է հենց պեպեններով, գուցե հենց պեպեններն են տալիս նրանց դեմքին առանձնահատուկ գեղեցկություն»:
Անի Գյոզալյան
