Ընտրությունների ավարտից շուրջ երեք ժամ հետո ԿԸՀ-ում այդ ընտրությունների վերաբերյալ իր տպավորությունների մասին խոսեց ԱՊՀ միջխորհրդարանական վեհաժողովի դիտորդական առաքելության ներկայացուցիչ Վլադիմիր Մարուշչենկոն, որը ներկայացնում էր Ուկրաինայի խորհրդարանը։ Նա ասաց, թե առաջին անգամ է Հայաստանում գտնվում եւ հաճելիորեն զարմացած է Հայաստանում գործող ընտրական օրենսդրությամբ։
Մարուշչենկոն ասաց, թե եղել է ընտրական մի քանի տեղամասերում եւ իր դիտարկմամբ ընտրական պրոցեսն այդ տեղամասերում համապատասխանել է գործող օրենսդրությանը։ Միակ բանը, որ նա հարկ համարեց շեշտել՝ տեղամասերում ընտրողների գոյացած հերթերն են եղել, որը, ուկրաինացի դիտորդի համոզմամբ, չի կարելի համարել ընտրական հանձնաժողովների մեղավորությունը։
Նրա դրական գնահատեց ընտրությունների ընթացքը եւ հայտարարեց, որ թեեւ հիմա նոր միայն ստացվում են ընտրությունների վերաբերյալ նախնական տվյալներ, այդուհանդերձ, համոզմունք հայտնեց, որ ընտրությունները զարգացում են արձանագրել։
Լրագրողներից մեկի այն հարցին, թե ինչպե՞ս է Մարուշչենկոն բացատրում ԱՊՀ եւ եվրոպական դիտորդական առաքելությունների՝ հայաստանյան ընտրություններին տրվող մշտապես տարբեր գնահատականներին, ուկրաինացի դիտորդն ասեց, թե դրա բացատրությունն այդ առաքելությունների գնահատման տարբեր մեթոդիկաների կիրառումն է։
Մարուշչենկոն նաեւ ասաց, թե ԱՊՀ միջխորհրդարանական վեհաժողովի դիտորդական առաքելության համակարգողը երեկ հանդիպել է ԵԱՀԿ/ԺՀՄԻԳ-ի դիտորդների հետ, եւ որքան տեղյակ է, մինչեւ քվեարկության օրն արձանագրված ընտրական պրոցեսների վերաբերյալ նրանց տեսակետները համընկել են: ԱՊՀ դիտորդը նաեւ կարծիք հայտնեց, թե իրեն չի թվում, որ քվեարկությունից հետո այդ մոտեցումներում կարող են մեծ տարբերություն լինել։
Նաիրա ՄԱՄԻԿՈՆՅԱՆ
