Անկախ տեղացող հորդառատ անձրեւից՝ Կապանում շարունակվում էր ակտիվորեն ընթանալ քվեարկությունը: Պակաս ակտիվություն չէին ցուցաբերում նաեւ տեսողության, առողջական լուրջ խնդիրներ ունեցող եւ ոտքի վրա հազիվ կանգնող մարդիկ, որոնք ընտրատեղամաս էին այցելում օգնականների հետ:
Ըստ շրջանառվող լուրերի` մարզկենտրոնում ընտրակաշառքներ բաժանվել եւ շարունակվում են բաժանվել, սակայն ծպտված ու շատ մաքուր ձեւով, դա են վկայում առավոտվանից ընտրատեղամասերում գոյացած հերթերն ու տեղաշարժվելու եւ առողջական լուրջ խնդիրներով մարդկանց ակտիվ այցելություններն ընտրատեղամասեր:
Շատերը նույնիսկ սպասում էին երեկոյան ժամերին գնալու քվեարկության, քանի որ լսել էին, որ երեկոյան մի ձայնի դիմաց ընտրակաշառքի գինը բարձրանալու է` հասնելով 60 հազար դրամի:
Կարդացեք նաև
Կապանի ընտրատեղամասերի բակերը մշտապես մարդաշատ էին: Ընտրությունների ընթացքի հետ կապ չունեցող հավաքված երիտասարդները հսկում էին իրենց «հանձնարարված» տարածքները, հետեւում իրավիճակին եւ այլն:
Որոշ ընտրատեղամասերում էլ մասնակցած ընտրողների իրական թվի տարբերություն նկատվեց:
Խաղաղ վիճակ էր հատկապես գյուղական համայնքներում` Արծվանիկում ու Սյունիքում: Արծվանիկ գյուղական համայնքում Գորիսից դիտորդական առաքելություն կատարած եւ գյուղի ընտրատեղամաս այցելած Էնթոնի Բոյերը «Առավոտին» տեղեկացրեց, որ Գորիսում լուրջ միջադեպերի եւ ընտրական խախտումների ականատես չեն եղել:
Մերի ՍՈՂՈՄՈՆՅԱՆ
