Քանաքեռ ՀէԿ թաղամասում գտնվող 4/1 ընտրատարածքում պատգամավորների թեկնածուներ Արամ Մանուկյանի եւ Սաթիկ Սեյրանյանի վստահված անձինք արձանագրել են, որ մեծամասնականի քվեաթերթիկները մոտ 30-ով ավելի են, քան պետք է լիներ ըստ քվեարկած անձանց թվի: Այս փաստն արձանագրելուց հետո, 4/1 ընտրատարածքի հանձնաժողովի նախագահ Հեղինե Թոգրարյանին նշյալ թեկնածուների վստահված անձինք առաջարկել են հաշվել, սակայն հանձնաժողովի նախագահը հրաժարվել է` պատճառաբանելով, որ, միեւնույն է՝ վերջում հաշվելու են: Փաստի առիթով արձանագրություն էլ չի կազմվել:
Վստահված անձինք նաեւ փոխանցել են, որ 4/1 ընտրատարածք եկած մի բնակիչ` Սարգիս Մելքումյան անուն-ազգանունով, որը բնակվում է Քանաքեռ ՀԷԿ-ի Բանավան 16 շենքի 79 բնակարանում, պարզել է, որ իր անունը ընտրացուցակից բացակայում է, բայց փոխարենը իր բնակարանի վրա 2 օտար մարդու անուն է գրված եղել: Ականատեսների պատմելով, երբ Մելքումյանը պահանջել է վերականգնել իր անունը, հանձնաժողովի նախագահը «հիստերիայի մեջ է ընկել»` ասելով, որ տարածքը լքի, թե չէ `«մի հատ թաթալոշ կուտի», այնուհետեւ դիմել է ոստիկաններին, որպեսզի բնակչին դուրս տանեն ընտրատեղամասից:
Վստահված անձինք նաեւ պատմեցին, որ հանձնաժողովի նախագահի որդին` Հարություն Գրիգորյանը, որը որպես ՀՀԿ վստահված անձ է հանդես եկել, ընտրատարածքում «արտոնյալ դիրք է գրավել» եւ մարդկանց ցուցումներ տվել, թե ով ուր գնա, ինչ անի. «Մինչդեռ վստահված անձը իրավունք չունի ոչ մի բանի խառնվելուն»:
Լուսինե ԲՈՒԴԱՂՅԱՆ
