«Սյունիքի մարզի 37/39 տեղամասում ահռելի թվով զինվորականները քվեարկում են սպաների հսկողության տակ»,- Aravot.am-ի հետ հեռախոսազրույցում ահազանգեց ԲՀԿ-ական դիտորդ Հայկ Գալստյանը: Հանձնաժողովի ՀՀԿ-ական նախագահն արհամարհել է դիտորդների պահանջը՝ բացառել սպաների ներկայությունը ընտրական սրահում:
Ինչպես նաեւ, այս տեղամասում, օքսիդացող թանաքն էլ չի փոխվել: Ինքը՝ հանձնաժողովի նախագահը խոչընդոտում է նաեւ դիտորդների եւ վստահված անձանց ազատ տեղաշարժին տեղամասում: ԲՀԿ-ի վստահված անձինք տեսագրել են ինչպես զինվորականների ուղղորդված քվեարկության փաստերը, այնպես էլ հանձնաժողովի նախագահի գործողությունները:
Իսկ 37/2 տեղամասում մի որոշ ժամանակ մի քանի մարդիկ են եղել, ովքեր ծանոթ-անծանոթների ձեռքից խլել են քվեաթերթիկները, ինքնուրույն նշումներ արել եւ գցել արկղը: Դեպքի մասին Aravot.am-ին տեղեկացրեց ԲՀԿ-ի վստահված անձ Արմեն Մելիք-Քարամյանը: Ոստիկանությունը չի միջամտել, թեեւ ԲՀԿ համամասնական ցուցակում ընդգրկված թեկնածուներից մեկի օգնականը պաշտոնապես ահազանգել է Գորիսի ոստիկանություն: Միջադեպին չի միջամտել նաեւ հանձնաժողովի նախագահը՝ չնայած ԲՀԿ-ի դիտորդների եւ վստահված անձանց պահանջին: Տվյալ անձանց տեղացիները ճանաչել են իբրեւ Սյունիքի մարզպետ Սուրիկ Խաչատրյանի բարեկամներ: Այս միջադեպի տեսագրությունը նույնպես կա:
Նելլի ԳՐԻԳՈՐՅԱՆ
Կարդացեք նաև
