Aravot.am-ը կապ հաստատեց «Միավորված հայեր» կուսակցության նախագահ Ռուբեն Ավագյանի հետ, պարզելու՝ իրենց վստահված անձինք որևէ ընտրախախտում արձանագրե՞լ են: Մեզ հետ զրույցում պարոն Ավագյանն ասաց. «Ինչ-որ պետք էր անել, մինչև այսօր արդեն արել են, գումարները բաժանված են, ամեն ինչ կազմակերպված: Այսօր ընդհանուր առմամբ խաղաղ է, մենք չունենք այն հնարավորությունը, որ բոլոր ընտրական տեղամասերում վստահված անձինք ունենայինք, ունենք միայն 502 վստահված անձ, որոնք այս պահի դրությամբ խախտումներ չեն արձանագրել»:
Պարոն Ավագյանն ասաց, որ ինքը գիտի, որ ընտրակաշառք են բաժանում նաև այսօր, սակայն որպես իրավաբան՝ չի կարող խոսել այդ մասին, քանի որ կոնկրետ փաստեր չունի: Պարոն Ավագյանը վրդովվեց. «Ես, որ քարոզարշավի ընթացքում ասում էի, որ միայն երրորդ ուժը կարող է երկիրը հանել այս իրավիճակից, իմ աչքի առաջ ունեի այն ամենը, ինչ այսօր կատարվում է: Իսկ այս իրավիճակի համար մեղավոր են իշխող կուսակցությունները: Օրենքը ծառայում է միայն մեծահարուստներին, ժողովրդին հասցրել են այնպիսի ծանր նյութական վիճակի, որ նա ոչ թե գլխով, այլ փորով է մտածում: Այլևս չի կարելի լռել: Բոլորը տեսնում են, որ ընտրակաշառք է բաժանվում, բոլորը խոսում են այդ մասին, սակայն իրավապահ մարմինները ոչինչ չեն արձանագրում»:
Տաթև ՀԱՐՈՒԹՅՈՒՆՅԱՆ
