8/32 ընտրատեղամասում քվեարկելու գնացած Նիկոլ Փաշինյանը, որը թիվ 7 ընտրատարածքում մեծամասնականով առաջադրված պատգամավորության թեկնածու է, ընտրատեղամասը դեռ չլքած՝ նկատել է, որ անձնագրից կնիքն անհետացել է:
«Չեմ հասցրել լքել ընտրատարածքը եւ իմ անձնագրում կնիքից ոչ մի հետք չէր մնացել, ահա եւ ձեզ ընտրությունների գնահատականը: Փաստն այն է, որ օրինական այն նորմը, որը պիտի կանխեր զանգվածային կրկնակի քվեարկությունները, այդ նորմը չի գործում, եւ ես դա կարող եմ ապացուցել սեփական անձնագրի օրինակով»,-Aravot.am-ի հետ զրույցում ասաց պարոն Փաշինյանը:
Նիկոլ Փաշինյանի խոսքերով, ցնդող կնիքի պարագայում ոչ ոք չի կարող վերահսկել, թե մի հոգին քանի տեղ կարող է քվեարկել: Ինչ վերաբերում է այլ տեսակի ընտրախախտումներին, պատգամավորի թեկնածուն ասաց, որ իրենք բազմաթիվ արձանագրություններ ունեն կազմած եւ օրվա վերջում պետք է այդ բոլորն ի մի բերեն, որից հետո կխոսեն այդ մասին:
Լուսինե ԲՈՒԴԱՂՅԱՆ
