Ընտրություն տանող ճամփան կեղտոտ է
Արարատի թիվ 18/06 ընտրատեղամասում օրվա առաջին կեսին մեծ հերթ էր գոյացել: Ընտրողներից յուրաքանչյուրն ուզում էր իր հերթը «առաջ գցել»: Ընտրատարածքի հանձնաժողովի անդամները, վստահված անձինք եւ դիտորդներն ամեն կերպ փորձում էին կարգավորել ստեղծված իրավիճակը: Ընտրատեղամասում սպասում էր իր ընտրությանը մարդկանց ամբոխը, ընտրատեղամասից դուրս` մարդիկ բողոքում էին` ընտրություն տանող ճամփան կեղտոտ է. «Գոնե այս օրով ճանապարհը մաքրեին, կեղտոտ է ու գարշահոտ է տիրում»,- բողոքում է ընտրատամաս գնացողը: Ասում է` ընտրությունն է պարտավորեցնող, իր ձայնը կարեւոր է, այլապես չէր գա:
Ընտրողներից յուրաքանչյուրն ուզում էր իր հերթը «առաջ գցել»
18/06 ընտրատեղամասի հանձնաժողովի նախագահ Մարտին Օրդոյանը փաստում է` այստեղ ընտրություններն անցնում են հանգիստ, առանց միջադեպերի. «Ընդամենը օրվա սկզբին մի քիչ հերթ էր գոյացել»,- ասում է նա: Ըստ նրա` տեղամասի ընտրացուցակներում գրանցված է 1606 ընտրող, որից է 760 –ը 14:50-ի դրությամբ մասնակցել է ընտրությանը. «Մենք այս ժամի համար ավելի շատ մարդ էինք կանխատեսում, բայց դեռ մարդկանց հոսքը կա, հուսով ենք` մինչեւ ընտրության ավարտը 1400 ընտրող կունենանք»,- ասում է նա:
Արարատի թիվ 18/07 ընտրատարածքում 15:30-ի տվյալներով` 1520 ընտրողից 820-ն արդեն մասնակցել են քվերակությանը: Ընտրատեղամասի նախագահ Կարինե Աբրահամյանի խոսքով ` քվեարկության ընթացքում այստեղ որեւէ միջադեպ չի գրանցվել:
