Ազգային ժողովի ՀՀԿ-ական փոխխոսնակ եւ ՀՀԿ մամուլի խոսնակ Էդուարդ Շարմազանովը Aravot.am-ի հետ զրույցում ընտրություններին մասնակցող բոլոր քաղաքական ուժերին կոչ արեց հանգիստ իրենց գործով զբաղվել, քանի որ, ըստ նրա, բոլոր պայմանները ստեղծված են, որպեսզի ընտրություններն ընթանան ազատ եւ արդար: «Որոշ գործիչների խորհուրդ կտայի թողնել հիստերիկ եւ ամպագոռգոռ հայտարարությունները եւ ընտրություններում տեղի ունեցող խախտումների կոնկրետ փաստերի վերաբերյալ թող դիմեն իրավապահ մարմիններին»:
Ըստ Շարմազանովի՝ եւ ոստիկանությունը, եւ դատախազությունը բավականին օպերատիվ աշխատանք են իրականացնում: Aravot.am-ի դիտարկմանը, թե բազմաթիվ ահազանգեր են հնչում հանրապետականների կողմից ընտրակաշառք բաժանելու վերաբերյալ, Շարմազանովը հղում անելով ոստիկանության քիչ առաջ հրապարակած տեղեկությանը՝ ընտրակաշառքի առիթով բերման ենթարկված 2 անձանց վերաբերյալ, ասաց. «Այո, ընտրակաշառքի դեպքեր եղել են, բայց այդ մարդիկ հանրապետականներ չեն: Կոռեկտությունս թույլ չի տալիս բարձրաձայնեմ, թե որ կուսակցության անդամներ են նրանք»: Տեղեկացնենք, որ ըստ ոստիկանության տվյալների՝ ընտրակաշառքի փաստի առիթով բերման ենթարկվածները ԲՀԿ-ականներ են:
Նելլի ԳՐԻԳՈՐՅԱՆ
