Aravot.am-ը կապվեց Հայաստանի դեմոկրատական կուսակցության (ՀԴԿ) նախագահ Արամ Սարգսյանի հետ՝ պարզելու, այս պահի դրությամբ իրենք ի՞նչ խախտումներ են արձանագրել: Պարոն Սարգսյանը պատասխանեց. «Մեզ հասած տեղեկությունների համաձայն՝ ոչ բոլոր ընտրատեղամասերում են ճիշտ օգտագործում կնիքները, քանի որ կրկին գրանցվել են դեպքեր, երբ կնիքի թանաքն օքսիդացել է: Փաստորեն, խնդիրն այստեղ ոչ թե թանաքն է, այլ օգտագործման սխալ ձևը»:
Դեմկուսը արձանագրել է ևս մեկ խախտում, որի մասին Aravot.am-ին տեղեկացրեց ՀԴԿ նախագահը. «Երևանի թիվ 50 դպրոցում, որտեղ տեղակայված է 8/30 ընտրական տեղամասը, գրանցվել է մի դեպք, երբ քաղաքացին փորձել է քվեարկել ուրիշի անձնագրով: Դեպքը կանխվել է և կազմվել համապատասխան ակտ»:
Aravot.am-ը Ա. Սարգսյանին խնդրեց գնահատել արդեն իսկ գրանցված բռնությունների դեպքերը, մասնավորապես՝ ՀԱԿ և ԲՀԿ վստահված անձանց նկատմամբ: ՀԴԿ նախագահը նշեց. «Կարծում եմ, որ եթե իրավապահ մարմիններին չի հաջողվել կանխել այսպիսի դեպքերը, ապա գոնե պետք է պատժեն դա իրականացնողներին: Սակայն մեր կարծիքով՝ իրավապահները այս ընտրարշավի ընթացքում որևէ խնդիր չլուծեցին, մասնավորապես կապված համատարած ընտրակեղծիքների հետ»:
Տաթև ՀԱՐՈՒԹՅՈՒՆՅԱՆ
