«Արեգնազան» կրթահամալիրում տեղակայված թիվ 9/15 ընտրատեղամասում իր քաղաքացիական պարտքը կատարեց Հայաստանի դեմոկրատական կուսակցության (ՀԴԿ) նախագահ Արամ Սարգսյանը: Նշենք, որ այս ընտրատեղամասում գրանցված է 1845 ընտրող, որոնցից մոտ 150-ը ժամը 10.30-ի դրությամբ կատարել էր իր քաղաքացիական պարտքը:
Aravot.am-ի հետ զրույցում ընտրական հանձնաժողովի նախագահ Գոհարիկ Օսիպյանը տեղեկացրեց, որ ընտրատեղամասը բացվել է ժամը 8.00-ին: Հենց այդ ժամանակ էլ գրանցվել է առաջին ընտրողը: 10.30-ի դրությամբ այս ընտրատեղամասում արտակարգ պատահարներ տեղի չէին ունեցել:
Քվեարկությունից հետո Ա. Սարգսյանը հայտարարեց, որ իրենք արդեն արձանագրել են խախտումներ. «Արձանագրել ենք, որ փողոցներում դեռ շարունակվում են փակցված մնալ նախընտրական պաստառները, ինչը խախտում է»:
Կարդացեք նաև
Անդրադառնալով՝ Հանրապետության հրապարակում տեղի ունեցած դժբախտ պատահարին՝ պարոն Սարգսյանը նշեց. «Լավ կլիներ, եթե այդ պատահարը տեղի չունենար: Ես քվեարկում եմ հանուն նրա, որ ունենանք այնպիսի Հայաստան, որտեղ ժողովուրդը իշխանություններից շնորհակալ կլիներ, որ նա հեռանար: Ցավոք, բայց քարոզարշավի ընթացքում ականատես եղանք համատարած ընտրակաշառքների, որոնց ոչ դատախազությունը, ոչ էլ ոստիկանությունը հանապատասխան արձագանք չտվեց»:
ՀԴԿ-ն այս ընտրություններին մասնակցում է 1700 վստահված անձերով: Ա. Սարգսյանը տեղեկացրեց, որ ինքը ողջ օրը գտնվելու է նախընտրական շտաբում, իսկ եթե հաղթանակեն, երեկոյան շամպայն կըմպեն:
Տաթեւ ՀԱՐՈՒԹՅՈՒՆՅԱՆ
