Քիչ առաջ «Ժողովրդավարական հայրենիք » կուսակցության նախագահ Պետրոս Մակեյանը Aravaot.am -ին բողոքեց, որ Անիի տարածաշրջանի ոստիկանությունը մոտ 3 ժամ խոչընդոտել է Մարալիկում գտնվող իր նախընտրական շտաբի աշխատանքները: Պարոն Մակեյանի ներկայացմամբ, ինքը ահազանգ է ստացել Արթիկի ու Մարալիկի շրջանի տարբեր գյուղերից այն մասին, որ ՀՀԿ-ն ու ԲՀԿ-ն մասսայաբար ընտրակաշառք են բաժանում` 10 հազարական դրամ, ինքը ահազանգել է ոստիկանության թեժ գիծ` հասցեական նշելով, թե այդ պահին որտեղ են բաժանում ընտրակաշառքը: Սակայն, ոստիկանությունը, նշված հասցեն գնալու ու փաստերը ճշտելու փոխարեն, պարզել է, թե ո ՞ր հեռախոսահամարից են ահազանգել ու 6 ոստիկանով լցվել են Մարալիկի իր նախընտրական շտաբ:
«Ես ոստիկանապետի տեղակալին` Կարեն Մարտիրոսյանին հարցրեցի` ինչու՞ եք եկել, պատասխանեց` մեր պարտականություններն ենք կատարում, ասի `ձեր պարտականությունը ընտրակաշառքը բաժանողի հետևից գնալն է , այ խնդրեմ, հենց այս պահին գնացեք Գուսանագյուղ ու փաստերը ստուգեք: «Թեժ գիծ» կոչվածը թատրոն է, ճիշտ 2008 թվականի պատմությունն է, երբ ահազանգում ես ոստիկանություն, որ այսինչ տեղը ընտրակաշառք են բաժանում ու դու ես կրակը ընկնում: Ոստիկանները եկել, ասում էին ` դե ապացուցի, որ ընտրակաշառք են բաժանում, հիմա մարդկանց ձեռքն ես բռնում չես ապացուցում, փոխանակ իրենք գնան իմ տված հասցեով, իրենց աչքով տեսնես, ես պիտի՞ բանավոր կարգով իրենց ապացուցեմ: Ըստ էության, մտածում եմ, որ Մարալիկում կոնգրեսը ուժեղ է, և որպեսզի այլևս չահազանգենք ու ոստիկանությանը չանհանգստացնենք կաշառքի հարցով, գալիս թատրոն սարքում, գնում են: Բայց ես ասում եմ կաշառքը թիվ 36 ընտրատարածքում համատարած են բաժանում, ՕԵԿ-ն էլ պատրաստվում է հեռախոսներ ու լիցքավորման քարտեր բաժանել», -տեղեկացրեց Պետրոս Մակեյանը:
Aravot.am-ը այս դեպքի շուրջ պարզաբանումներ խնդրեց նաև Անիի ոստիկանապետի տեղակալ Կարեն Մարտիրոսյանից: Մեր հարցին, թե ինչո՞ւ չեն գնում դեպքի վայր , այլ շտապում են ահազանգողի մոտ, փոխոստիկանապետը մեզ տեղեկացրեց, որ թեժ գիծը Երևանում է, բայց իրենք հեռախոսահամարը ճշտել են, որպեսզի գնան ու ահազանգողից ճշտեն, թե ի՞նչ ի նկատի ունեն, նրանցից գրավոր փաստաթուղթ վերցնեն, որպեսզի հիմք ունենան ձեռքի տակ: Մեր դիտարկմանը, թե Մակեյանը ձեզ հստակ ասել է հասցեն, առաջարկել է գնալ Գուսանագյուղ ու փաստերը ստուգել, դուք ստուգե՞լ եք, պարոն Մարտիրոսյանը պատասխանեց, որ իրենց անձնակազմից մարդ են ուղարկել մատնանշված գյուղ: Մեր այն հարցին էլ , թե փաստերը իրականությանը համապատասխանե՞լ են, ընտրակաշառք բաժանողին բռնե՞լ եք, փոխոստիկանապետը առաջարկեց այլ մանրամասներ ճշտել իրենց լրատվական բաժնից: Ի դեպ , նա պնդում էր, որ պարոն Մակեյանի նախընտրական շտաբում ինքը եղել է ընդամենը մի քանի րոպե, այլ ոչ թե 3 ժամ, ինչպես որ ներկայացնում է թեկնածուն:
Նշենք, որ հենց նոր մեզ ահազանգեց Մարալիկում Պետրոս Մակեյանի նախընտրական շտաբի պատասխանտու Հարություն Ուռուտյանը `տեղեկացնելով, որ իրեն ծանուցագիր են ուղարկել ոստիկանություն ներկայանալու համար:
Կարդացեք նաև
Նունե ԱՐԵՎՇԱՏՅԱՆ
