Երեւանի Հանրապետության հրապարակում ՀՀԿ-ի նախընտրական ամփոփիչ հանրահավաքի ժամանակ բռնկված հրդեհի արդյունքում մոտ 40 մարդ է տուժել, որոնք տեղափոխվել են տարբեր հիվանդանոցներ` հիմնականում, այրվածքաբանական բաժիններ: Վիրավորները տարբեր աստիճանների վնասվածքներ են ստացել, սակայն ոչ մեկի կյանքին վտանգ չի սպառնում:
Հանրահավաքում իր ելույթն ավարտելուց հետո, ՀՀ եւ ՀՀԿ նախագահ Սերժ Սարգսյանը մի շարք պատգամավորների ուղեկցությամբ այցելել է հիվանդներին:
Իսկ մինչ այդ հանրապետության հրապարակում տարբեր տրամադրություններ կային: Ոմանք կարծում էին, որ Սերժ Սարգսյանը ճիշտ արեց, որ հանրահավաքը չընդհատեց, որպեսզի խուճապն ավելի չբորբոքեր: Այլոք էլ կարծում էին, որ դժբախտ պատահարի այդքան տուժածների պարագայում, հավաքը պետք է դադարեցվեր, անկախ նրանից, որ դա քարոզչական վերջին ակորդն էր:
Նելլի ԳՐԻԳՈՐՅԱՆ
