ՖՈՏՈԼՈՒՐ
Հոգեբան Կարինե Նալչաջյանի ձեւակերպմամբ` քարոզարշավի ամբողջ ընթացքը հանգիստ, խաղաղ, առանց ցնցումների էր, ցածր տոներով, ինչի հետ կապված էլ խորհուրդ է տալիս միայն դրականը տեսնել՝ «ամեն ինչ ցիվիլ էր, առանց վիրավորանքների: Եթե նախընտրական փուլը բերեր որեւէ ցնցումների, այդ դեպքում լավ չէր լինի: Վատ էր այն, որ լուրջ ու բովանդակալից դեբատներ, բանավեճեր չեղան, քարոզարշավն անցավ միայն հանդիպումների ձեւով, իսկ թե որ ուժին ինչքանով հաջողվեց մարդկանց հավատ ներշնչել, կերեւա ընտրություններից հետո»:
Նալչաջյանը նշում է՝ եղան փոքր ու մեծ հանրահավաքներ, շատ խոսվեց ընտրակաշառքի մասին, ինչ որ տրագիկոմիկական երանգ ուներ այդ ամենը, բայց դրանց մեջ խորանալը ինքնանպատակ էր, որովհետեւ չերեւաց կարեւորը: «Կաշառքը դադարեց գործոն դառնալ: Այս անգամ կսկսի գործել խղճի մտոքը»,- ասաց Նալչաջյանը՝ հավելելով, որ ինքը չի տեսնում հզոր, առաջատար ուժ, որի ետեւից կգնա հասարակության մեծ զանգվածը:
Բանախոսի ձեւակերպմամբ՝ մարդկանց տրամադրվածությունը բավականին զուսպ է, չկողմնորոշվածները շատ են. «Այս ընտրություններում ժողովուրդը մտավ ավելի շատ կուսակցականացված: Այս անգամ ավելի շատ մարդիկ իրենց գրպաններում կուսակցական տոմսեր ունեն: Տպավորություն ունեմ, որ այդ կուսակցականացումը տոմսային է, ոչ թե գաղափարների հետեւից գնացող»:
Նալչաջյանը նշում է՝ հորիզոնի վերջում նախագահական ընտրությունները հաշվի առնելով են մարդիկ մտել այս քաղաքական պայքարի մեջ: Իսկ թեկնածուների կարգախոսների հաջողված լինել -չլինելն էլ առանձնապես նշանակություն չունի, քանի որ դրանցով ոչինչ չորոշվեց, որովհետեւ եթե մարդիկ չեն վստահում, ասվածն իր արժեքը կորցնում է:
Կարդացեք նաև
Կուսակցությունների մասով էլ Նալչաջյանը կարծում է, որ կան առաջատարներ: «Օրինակ, համակրանք կա ՀՀԿ-ի նկատմամբ, ՕԵԿ-ին կրկին հաջողվեց համակիրներ շահել, քանի որ ներկայանում էին կոռեկտ, կիրթ մարդկանց դեմքերով ու եթե ընտրարշավը չավարտվեր, նրանք կավելացնեին իրենց ձայները: ՀՅԴ-ն մնում է նույնը, այսինքն՝ իր համակիրներով, ԲՀԿ-ն շատ սահմանազատվեց արհեստականորեն, «Ժառանգության» հետ կապված՝ անորոշություն կա մարդկանց մոտ, ՀԱԿ-ը հիասթափությունների բերեց ժողովրդին, մարդկանց աչքերը բացվեցին, ՀԱԿ-ի աստեղային ժամն անցավ: «Կոմկուսն» իր առաջնորդի համակրելի կերպարի շնորհիվ ստիպում է մարդկանց համակրանքով մոտենալ իրենց, բայց, օրինակ, երիտասարդների համար նրանք գոյություն չունեն: «Դեմկուսի» պարագայում, նրանց ղեկավարը անընդհատ երեւում էր իր վերլուծություններով, ու դա շատ լավ քայլ էր նորից ասպարեզ դուրս գալու համար»- նշեց նա:
Եվա ՀԱԿՈԲՅԱՆ
