«Առաջին անգամը չէ, որ կրոնական կառույցներն ակտիվ մասնակցում են քաղաքական կյանքին: Խնդիրն այն է, որ իրենց առաջնորդի պարտադրանքով դրանց անդամները ընտրում են որեւէ կուսակցության: Ակտիվ են եղել նաեւ նախորդ ընտրությունների ժամանակ, երբ նոր հայտնված կուսակցությունը միանգամից հավաքեց 60.000 ձայն: Դա ենթադրում է, որ կրոնական կառույցները կարողանում են քաղաքական կյանքը սարքել իրենց ձեռքի խաղալիքը»,-այսօր «Հենարան» ակումբում ասաց Քայքայիչ պաշտամունքից տուժածների օգնության եւ վերականգնողական կենտրոնի ղեկավար Ալեքսանդր Ամարյանը: Բանախոսը նշեց, որ վերջերս Ֆեյսբուքյան էջերից մեկում հայտնվել էր տեղեկատվություն, որ Կյանքի Խոսքը եւ Ավետարանչական եկեղեցին համագործակցում են «Ժառանգության» հետ: Մասնավորապես, ըստ նույն աղբյուրի, այդ կառույցները սատարելու են Զարուհի Փոստանջյանին:
Ա. Ամարյանի խոսքով` առաջադրված 8 կուսակցությունից 5-ը բանակցում են աղանդավորական կառույցների հետ` բացի «Միավորված հայերից», Կոմունիստական կուսակցությունից. «ՀՀԿ-ն, հավանաբար, վստահ է, որ կհաղթի, դրա համար չի բանակցել»: Ըստ Ա. Ամարյանի հայտնած տվյալների` Հայաստանում գրանցված է մոտ 350.000 ոչ հայ առաքելական եկեղեցու հետեւորդ, որոնցից շուրջ 230.000-ը կրոնական կառույցների անդամներ են. «Դա կազմում է ընտրողների տասը տոկոսը, ինչը բավարար է խորհրդարան մտնելու համար»:
Բանախոսը նաեւ հայտնեց, որ անցյալ տարվա վերջին հանդիպել են X կուսակցության ղեկավարը, X բուհի ռեկտորը, որը միաժամանակ երկու կուսակցության անդամ է եւ Խարիզմատիկ եկեղեցու X ղեկավարներից: Հանդիպման ընթացքում խոսք է գնացել ընտրություններից. «Առաջնորդը հավանություն է տվել, որ իր հետեւորդները մասնակցեն քվեարկությանը, իսկ նրանց թիվը հասնում է 25000-ի»,-ասաց պարոն Ամարյանը` հավաստելով, որ կրոնական կառույցները որոշել են դուրս գալ ազգի եւ եկեղեցու դեմ` թիրախային նպատակ համարելով փողն ու իշխանությունը:
Բացի արտասահմանյան ֆինանսավորումից, կրոնական կառույցները գումարներ են ստանում դոնորներից, տվյալ դեպքում` քաղաքական ուժերից, եւ ցանցային մարքեթինգից. «Օրինակ` «Օրիֆլեյմ», «Ֆաբերլիկ», «Վիժն»: Այդ ընկերությունների ապրանքների հետ Հայաստան է մտնում աղանդավորական գրականություն: Բացի այդ` ֆինանսավորում են իրենց անդամներին անձական բիզնեսներից»:
Կարդացեք նաև
Ըստ բանախոսի, աղանդավորական կառույցների հետ համագործակցում են նաեւ ԵՊՀ հոգեբանության ֆակուլտետը, ռոմանոգերմանական ֆակուլտետից՝ Սվետլաննա Գալստյանը. «Անուններ տալով խնդիրը չենք լուծում, քանի որ մարդիկ միայն գնում են անունի ու սենսացիայի հետեւից: Օրինակ` ԶԼՄ-ում հայտնվել էր տեղեկություն, թե Արթուր Բաղդասարյանը Կյանքի Խոսքի եկեղեցի է գնում, բայց հավաստիացնում եմ, որ դա այդպես չի»,-ասաց Ա. Ամարյանը` հավելելով, որ կուսակցությունների անունները կհրապարակի ընտրություններից հետո:
Ստեղծված իրավիճակից ելքը փորձագետը տեսնում է պետության ղեկավարի կամքի եւ ժողովրդի համախմբվածության մեջ. «Մեր մեռած օրենքով կարող ես միայն գրանցել կրոնական կառույցները, բայց չկան դրանց նկատմամբ կիրառվող վերահսկողություն եւ պատժամիջոցներ»:
Ա. Ամարյանի համոզմամբ` ցանկալի կլիներ ԱԺ-ում տեսնել Առաքելական եկեղեցու ներկայացուցիչների, քանզի վերջիններս կձգտեն մաքուր պահել հոգեւոր դաշտը. «Եկեղեցին վերջին երկու տարիներին ակտիվ դիմադրում է կրոնական կառույցներին, քարոզում, այցելում գյուղեր»:
Լուիզա ՍՈՒՔԻԱՍՅԱՆ
