«Ես կարծում եմ, որ դա պետք չէ դիտել, զուտ որպես մի լուրջ երեւույթ: Նման դեպքերում պետք է անմիջապես ահազանգել իրավապահ մարմիններին: Մենք ինքներս էլ մեր կողմից կատարում ենք համապատասխան աշխատանք»,- այսպես արձագանքեց ԱԺ պետաիրավական հարցերի հանձնաժողովի նախագահ, ՀՀԿ-ական Դավիթ Հարությունյանն Aravot.am-ի դիտարկմանը՝ կարծես «առաջին ծաղիկները» սկսեցին երեւալ եւ ՀՀԿ-ական տարբեր դասի ներկայացուցիչների կողմից արդեն իսկ ճնշումներ, միջադեպեր են լինում ընդդիմադիրների նկատմամբ՝ ընտրական գործընթացներում:
Մեր զրուցակիցը նաեւ հավելեց. «Մի քանի դեպքերը, որոնք ըստ նախնական ենթադրությունների, կատարել էին հանրապետականները, որեւէ առնչություն չունեին կուսակցության հետ եւ ես կարծում եմ, որ սա, ցավոք, շատ հաճախ լինում է ուղղակի սադրանք»:
Aravot.am-ի հաջորդ դիտարկմանը՝ քարոզարշավը հարթ ընթացավ եւ բոլորը սպասումներ ունեն, որ ընտրությունների օրը պոռթկումներ են լինելու, կիսո՞ւմ եք այդ մտավախությունները, մեր զրուցակիցը պատասխանեց. «Ես հուսով եմ, որ որեւէ պոռթկումներ չեն լինելու: Թեեւ տեղերում կարող է լինեն առանձին միջադեպեր: Այնուամենայնիվ, ամեն ինչ պետք է անենք, որպեսզի դրանք անմիջապես վերացվեն: Եվ այս տեսանկյունից, շատ կարեւորում եմ նաեւ իրավապահ մարմինների օպերատիվ աշխատանքը, արձագանքը նման միջադեպերին: Ընդհանուր առմամբ, ես նորից իմ վստահությունն եմ հայտնում, որ այս ընտրությունները որակապես այլ ընտրություններ են լինելու»:
Ընտրություններին մասնակցող բոլոր քաղաքական ուժերը հայտարարում են, որ եթե իրենց ձայները «գողանան»՝ չեն լռելու եւ պայքարելու են: Պարոն Հարությունյանից հետաքրքրվեցինք՝ ՀՀԿ-ն ի՞նչ է անելու: «Եթե որեւէ մեկի ձայները գողացվեն՝ մենք կմիանանք նրանց»,- ասաց Դավիթ Հարությունյանը: Նա վստահեցրեց, որ ՀՀԿ-ն, որպես ընտրությունների կազմակերպման եւ իրականացման պատասխանատու, նախ իր կողմից անելու է առավելագույնը, որպեսզի որեւէ մեկի ձայները չգողանան. «Այնպես որ, մենք նույն ձեւով մտահոգ ենք ընտրությունների անցկացման պատշաճ որակ ապահովելու հարցում եւ պատրաստ ենք անելու ամեն ինչ, որպեսզի ընտրությունները լինեն պատշաճ»:
Կարդացեք նաև
Նելլի ԳՐԻԳՈՐՅԱՆ
