Երեկ երեկոյան, Երեւանի Կենտրոն համայնքի թիվ 9 ընտրատարածքի 9/19 տեղամասային ընտրական հանձնաժողովի նախագահ, «Ժառանգություն» կուսակցության ներկայացուցիչ Հայկ Գրիգորյանը բռնության է ենթարկվել: Aravot.am-ին այդ մասին հաղորդեց կուսակցության նախընտրական շտաբի խոսնակ Հովսեփ Խուրշուդյանը: Նրա ասելով, տեղի ունեցածի առնչությամբ նախընտրական շտաբը ՀՀ ոստիկանությանը հանցագործության մասին հաղորդում է ներկայացրել:
Խուրշուդյանի մատուցմամբ, Հայկ Գրիգորյանին ինչ-որ մարդիկ ավտոմեքենայով հետեւել են , մոտեցել եւ առաջարկել են զրուցելու համար նստել իրենց մեքենան, իսկ արդեն մեքենայի սրահում «համագործակցության» առաջարկ են արել՝ մանրամասնելով, որ ընտրությունների ժամանակ ինչ-որ մարդիկ կարող են որոշակի գործողություններ ծավալել, որի վրա եթե հանձնաժողովի նախագահը աչք փակի՝ իր համար հետո «լավ կլինի»:
Հայկ Գրիգորյանի հարցին, թե՝ այդ մարդիկ ո՞ւմ անունից են խոսում եւ ո՞ւմ են ներկայացնում, անծանոթները պատասխանել են, թե ՀՀԿ-ի մարդիկ են: «Ժառանգության» ներկայացուցիչը կտրականապես մերժել է առաջարկը, որին ի պատասխան հենց մեքենայի սրահում նրան բռնության են ենթարկել՝ ծեծել են:
ՀՀ ոստիկանությունում, ըստ մեր տեղեկությունների, Հայկ Գրիգորյանին դատաբժշկի ուղեգիր է տրվել:
Aravot.am-ը տեղի ունեցած միջադեպի առնչությամբ դիմեց նաեւ ՀՀ ոստիկանության հասարակայնության հետ կապերի եւ լրատվության վարչությանը՝ պարզաբանումներ ստանալու խնդրանքով: Դրանք ստանալուն պես կհրապարակենք:
ՀՀ ոստիկանության հասարակայնության հետ կապերի եւ լրատվության վարչությունից ի լրումն մեր տեղեկությունների, փոխանցեցին, որ գրանցված այդ միջադեպի առնչությամբ, մայիսի 3-ին, ժամը 20.50-ին, ոստիկանության Արաբկիրի բաժնում հաղորդում է տվել 1982 թ. ծնված Հայկ Գրիգորյանը, ըստ որի՝ նույն օրը, ժամը 12.30-ին, Ա. Խաչատրյան փողոցի թիվ 15 եւ Վ. Վաղարշյան փողոցի թիվ 23 շենքերի բակում 3 անհայտ քաղաքացիներ «ՎԱԶ 21012» մակնիշի ավտոմեքենայի մեջ հարվածել են իրեն եւ պատճառել վնասվածքներ: Ոստիկանությունում հաստատեցին, որ նշանակվել է դատաբժշկական փորձաքննություն, իսկ միջադեպի հանգամանքները պարզվում են, կատարվում է հետաքննություն: Ոստիկանության ՀԿԼ վարչության պետ Աշոտ Ահարոնյանն Aravot.am-ի հետ զրույցում հավաստիացրեց, որ այս միջադեպին վերաբերող բոլոր հանգամանքներն ամենայն մանրամասնությամբ հետաքննվելու են եւ դրան համարժեք իրավական գնահատական է տրվելու:
