–Անցած տարի ընդունվեցին մի շարք փաստաթղթեր, ըստ որոնց բարեփոխումների պետք է ենթարկվեր նաև Ոստիկանության կրթահամալիրը:
– Ներկայումս Ոստիկանության կրթահամալիրը ներառում է եռաստիճան կրթական համակարգ` միջազգային ստանդարտներին համապատասխան, որը չի եղել նախկինում, և այժմ այն իրականացվում է` ելնելով անցած տարի ընդունված Ոստիկանության կրթական բարեփոխումների ծրագրից: Եռաստիճան ուսումը իր մեջ ներառում է նախնական, միջին և բարձրագույն ուսում:
Նշեմ, որ մինչև 2011 թվականը Ոստիկանության համակարգում իրականացվում էին միայն բարձրագույն ուսումնական ծրագրեր` իրավաբանի դիպլոմ ստանալու համար, սակայն անցյալ տարվանից սկսած միջնակարգ դպրոցի շրջանավարտները, պարտադիր զինվորական ծառայությունն ավարտելուց հետո, կարող են ընդունվել Ոստիկանության կրթահամալիր: Ընդունվելու համար նախատեսված է տեստային համակարգ, ինչը ենթադրում է, որ մարդը գալիս և նստում է համակարգչի առջև և լրացնում է տեստը: Վերջինս իր մեջ ներառում է հարցեր ընդհանուր զարգացածությանն առնչվող` ասենք, աշխարհագրությունից հարցեր, նաև` տրամաբանությանը վերաբերող, նաև` հարցեր, որոնք ցույց են տալիս մարդու ` այս կամ այն ոչ-ցանկալի երևույթներից կախված լինելը: Տեստը` ԵԱՀԿ-ի աջակցությամբ` վերցվել է Կալիֆորնիայի համալսարաններից մեկից, տեղայնացվել է` ավելացվել են հատուկ` Հայաստանին վերաբերող հարցեր, այլք, և ԵՊՀ հոգեբանության ամբիոնի մասնագետների հետ միասին բերվել է վերջնական տեսքի, և այն փորձարկելուց հետո ստացվել են լավ արդյունքներ:
Վեց ամիս Ոստիկանության ուսումնական կենտրոնում սովորելուց հետո ստանում են ոստիկանական նախնական կրթություն և աշխատանքի են անցնում, և, կրկնեմ. այսպիսի բան նախկինում չի եղել:
Կարդացեք նաև
Նախորդ տարի ՀՀ Կառավարության որոշմամբ ստեղծվեց նաև Ոստիկանության քոլեջ, որը տալիս է միջին մասնագիտական կրթություն՝ «ոստիկանության սպա» մասնագիտացմամբ:
Նախորդ տարվա փորձարկման արդյունքները այնքանով էին լավ, որ առկա այն մտավախությունը, որ մարդիկ չեն կարող տեստերը լրացնել, ուղղակի հոդս ցնդեց: Այս տարի նույն տեստը գործելու է նաև ՀՀ Ոստիկանության ակադեկիայում, ստեղծվելու է 9 անդամներից կազմված հանձնաժողով, որոնցից 6-ը լինելու են դրսից` հասարակական կազմակերպությունների և պետական այլ մարմինների ներկայացուցիչներ: Այսպես, անցած տարի ընդունելության հանձնաժողովի կազմում էին “Transparency International”, ”Project Harmony” կազմակերպությունների, նաև՝ ԵԱՀԿ երևանյան գրասենյակի ներկայացուցիչները: Կցանկանայի ընդգծել, որ հետայսու բացառելու ենք ծանոթ-ազգականների «արտոնյալ» ընդունելությունը:
Կրթական բարեփոխումնրը լինելուն են ՀՀ Ոստիկանության հիմնական առանցքը: Սակայն միայն լավ պատրաստված նոր կադրերը բավարար չեն, պետք է իրականացնել նաև կադրերի վերապատրաստում:
ԵԱՀԿ երևանյան գրասենյակի աջակցությամբ հավաքների անցկացման ժամանակ ուժի ճիշտ գործադրման ուղեցույցեր են մշակվել: Ուղեցույցում հստակ` քայլ առ քայլ՝ ներկայացված է, թե ինչպես հավաքները վարել, որ խուսափել բախումներից: Մշակվել է նաև մի այլ ուղեցույց, որտեղ հստակորեն նշված է, թե ինչպես խուսափել ուժի կամ հրազենի անհարկի կիրառումից:
Մշակվել է ևս մեկ ուղեցույց, թե իրավախախտում կատարած անձին ինչպես պետք է Ոստիկանության բաժանմունք բերման ենթարկել, դրանում զետեղված են ռեալ կյանքից վերցված օրինակներ: Այս ուղեցույցի նպատակն է ոստիկանին ապահովել բոլոր անհրաժեշտ տեղեկություններով, որպեսզի նա իր իրավունքներից դուրս և ո՛չ մի միջոց չկիրառի:
Գուրգեն ԽԱԺԱԿՅԱՆ
