Ի հեճուկս այն լուրերի, թե Խաչատուր Սուքիասյանն այլեւս չի ուզում մասնակցել ՀԱԿ հանրահավաքներին, որովհետեւ ասել է, թե մի անգամ դրա համար կրակն է ընկել՝ այսօր Ազատության հրապարակում ՀԱԿ հանրահավաքին նա եկել էր եւ մնաց մինչեւ վերջ:
Aravot.am-ի հետ զրույցում մեր հարցին, թե ինչպե՞ս եք գնահատում Ձեր եղբոր՝ Սարիբեկ Սուքիասյանի շանսերը թիվ 10 ընտրատարածքում, հաշվի առնելով, որ ՀՅԴ -ն էլ սատարելու է ոչ թե Սարիբեկ Սուքիասյանին, այլ՝ Գարեգին Նուշիկյանին, պարոն Սուքիասյանը պատասխանեց. «Ի՞նչ կապ ունի, թե Գարեգին Նուշիկյանին ով է պաշտպանում, ով ուզում է՝ թող պաշտպանի: Ես շատ բարձր եմ գնահատում իմ եղբոր շանսերը, եւ նա հաղթելու է միանշանակ»:
Հիշեցնենք, որ այսօր ՀՅԴ խմբակցության ղեկավար Վահան Հովհաննիսյանը թիվ 10 ընտրատարածքի թեկնածուների մասին հայտարարել էր, որ «այնտեղ երկու տնտեսվարող իրար դեմ թեկնածություն են դրել: Նրանցից ոչ մեկն իմ կուսակցությունից չէ, այնտեղ ՀՅԴ-ն ընդհանրապես թեկնածու չունի: Բայց ես կցանկանամ, որ հաղթի Գարեգին Նուշիկյանը: Որովհետեւ, իմ կարծիքով, նա ավելի շատ է համապատասխանում այդ նոր կուլտուրայի մասին մեր պատկերացումներին, քան նրա մրցակիցները: Սա շատ պարզ է»: Նուշիկյանին իրենց սատարելու մասին են հայտնել նաեւ «Ազատ դեմոկրատների» նախագահն ու փոխնախագահը` Խաչատուր Քոքոբելյանն ու Ալեքսանդր Արզումանյանը:
Հռիփսիմե ՋԵԲԵՋՅԱՆ
Կարդացեք նաև
