Լեւոն Տեր-Պետրոսյանը ՀԱԿ հանրահավաքում ասաց, որ չի կասկածում՝ իշխող վարչախումբը այս անգամ էլ փորձելու է կեղծել ընտրությունների արդյունքները, բայց կարծում է, որ միջազգային հանրությունն այս անգամ ավելի զգույշ կտան իրենց գնահատականները՝ ասելով, որ ընտրությունները հիմնականում համապատասխանել են միջազգային չափանիշներին:
Տեր-Պետրոսյանը կարծում է, որ ճիշտ քվեարկության դեպքում ԱԺ-ում կարող է ձեւավորվել նոր, իրական կոալիցիա, ոչ թե ներկայիս ձեւական կոալիցիայի նման, որտեղ մենաշնորհատերը ՀՀԿ-ն է, իսկ կրտսեր գործընկերներին բաժին է ընկնում երկրորդական, նվաստացուցիչ դեր. «Դուք սխալվելու իրավունք չունեք, սխալվելը հավասարազոր է ինքնասպանության: Պատշաճ քաղաքացիական գիտակցություն դրեւորելու դեպքում ի զորու եք մայիսի վեցը դարձնել բեկումնային: Ուրիշ այսպիսի շանս գուցե այլեւս չլինի: Ձեզանից որեւէ զոհողություն չի սպասվում: Մի հավատացեք, թե իբր քվեախցում ձեր գործոություններին կարող են հետեւել, նման բան չի եղել եւ չի կարող լինել,այդ սուտը հորինվել է միամիտների համար: Դա ոչ թե կոնգրեսի հաղթանակն է լինելու, այլ սեփական արժանապատվությունը վերագտած քաղաքացիների հաղթանակը»:
Ներկաները գոռում էին՝ հաղ-թա-նակ, հաղ-թա-նակ: ՀԱԿ առաջնորդն առաջարկեց՝ «այնպես բարձր պետք է գոռաք հաղթանակ, որ Բաղրամյան 26-ում լսվի»: Իսկ Լեւոն Զուրաբյանը կոչ արեց երթի մասնակցել ու ցնցել Երեւանի փողոցները:
Հռիփսիմե ՋԵԲԵՋՅԱՆ
