«Բարգավաճ Հայաստան» կուսակցությունը թեեւ երկար էր պատրաստվել քարոզարշավային եզրափակիչ հանրահավաքին, սակայն անձրեւային եղանակը պատնեշ կանգնեց ԲՀԿ-ի եւ հանրության միջեւ: Քանի որ եղանակը ամպամած էր, իսկ մարդիկ էլ ժամը 16-ից արդեն իսկ հավաքվել էին Մատենադարանին հարող տարածքում, ԲՀԿ-ի հանրահավաքը կայացավ արագացված տեմպերով:
Շատ կարճ ելույթներ ունեցան ԲՀԿ նախագահ Գագիկ Ծառուկյանը, նախկին արտգործնախարար Վարդան Օսկանյանը եւ Նաիրա Զոհրաբյանը:
«Նայում եմ տասնյակ հազարավոր մարդկանց եւ գնահատականը մեկն է: Այսկերպ եք դուք պատասխանում տարբեր կարգի, ժողովրդի ասած չինական ու կոոպերատիվ հարցումներին,- նշեց Նաիրա Զոհրաբյանը:- ԲՀԿ-ն ու մեր առաջնորդ Գագիկ Ծառուկյանը միշտ եղել են ձեր վստահելի գործընկերը: Եկեք մեկ անգամ քվեարկենք այնպես, որ եւս մեկ ստիպված չլինենք հիշել հայի հետին խելքի մասին: Ես մեկ անգամ չեմ կասկածում, որ հաղթելու ենք»:
Վարդան Օսկանյանը իր ելույթում կոչ արեց. «Եթե այս վիճակը, որ ստեղծվել է հանրապետական կուսակցության պատասխանատվությամբ, հանդուրժելի է ձեզ համար, ընտրեք ՀՀԿ-ին: Ես վստահ եմ, որ քվեարկելու եք փոփոխությունների օգտին, այն ուժին, որ միշտ ձեր կողքին է եղել»:
Կարդացեք նաև
Ելույթների ընթացքում արդեն հորդառատ անձրեւ էր, ու քանի որ մարդիկ էլ սկսեցին հեռանալ, ԲՀԿ-ի սպասված հանրահավաքը այդքանով եզրափակվեց:
Ականատեսները պատմում են, որ ԲՀԿ-ական ղեկավարությունն այդ իրավիճակից շփոթության մեջ է ընկել եւ անհարմարությունից դուրս գալու համար հանրահավաքը հայտարարել է ավարտված: Հանուն արդարության արձանագրենք, որ հանրահավաքի ավարտված այս պահին էլ դեռեւս բավականին մեծ թվով մարդիկ կան այստեղ:
Նելլի ԳՐԻԳՈՐՅԱՆ
