«Առավոտ» օրաթերթի մայիսի 3-ի համարում Արամ Աբրահամյանը «Մարիի ձայնը» հոդվածում իր զարմանքն է արտահայտել «Մարի Գևորգյան Վրեժի» տվյալներով անձի` իր հասցեում հաշվառված լինելու կապակցությամբ:
Կարծում ենք` օրենքի չիմացությունն է հարգարժան խմբագրին մղել հապճեպ եզրակացությունների, ուստի ոստիկանությունը պարզաբանում է:
Մարի Վրեժի Գևորգյանը եղել է Զովունի 5 փողոցի 110 տան սեփականատերերից մեկը, որը 2002 թ. սեպտեմբերին Սպարտակ Ասոյանին է վաճառել բնակելի տունը, իսկ վերջինս 2007 թ. հուլիսին այն վաճառել է Արամ Աբրահամյանին:
Առուվաճառքի գործարքներից հետո նոր սեփականատերերը նախկին սեփականատերերին հաշվառումից չեն հանել, և Մարի Գևորգյանը հաշվառման այլ հասցե անձնագրային ծառայությանը սահմանված կարգով երբևէ չի տրամադրել:
Կարդացեք նաև
Ընդ որում` Մարի Գևորգյանը Զովունի 5 փողոցի 110 տանը հաշվառված է 16.01.1995 թվականից:
Եթե նոր սեփականատերը` Արամ Աբրահամյանը, ժամանակին դիմեր անձնագրային ծառայություն` նախկին սեփականատիրոջը հաշվառումից հանելու համար, ապա հավաստիացնում ենք, որ խնդիրն արագորեն կլուծվեր, և Ա. Աբրահամյանն էլ, ընթերցողներն էլ զերծ կմնային թյուրիմացությունից:
Ինչևէ, այսօր էլ ուշ չէ. եթե արդեն իսկ իրազեկված Արամ Աբրահամյանը դիմի անձնագրային ծառայություն /նման դիմումի իրավունք ունի բացառապես սեփականատերը/, հարցը կստանա իր լուծումը, ինչը կբացառի հետագա թյուրիմացությունները և, հուսով ենք, կվերականգնի հարգարժան Արամ Աբրահամյանի վստահությունը ոստիկանության ջանադրության ու անկեղծության հանդեպ:
ՀՀ ոստիկանություն
