-Պատմեք, խնդրեմ, ՀՀ-ում բիոմետրիկ անձնագրերի շրջանառության մեջ ներդրման մասին:
– Կենսաչափական տվյալներով, կամ այսպես կոչված բիոմետրիկ անձնագրերի հիմնական նպատակը անվտանգ հասարակություն ունենալն է: 2001 թվականի ԱՄՆ-ի դեպքերից հետո աշխարհը փոխվեց, և դա պարտադրեց, որ մարդիկ ունենան ավելի պաշտպանված անձը հաստատող փաստաթուղթ: Դրա համար պետք է ունենալ համապատասխան էլեկտրոնային կրիչով, կենսաչափական տվյալներով փաստաթղթեր, որպեսզի հնարավոր լինի անձի նույնականացումը, իդենտիֆիկացիան իրականացնել 100 տոկոսանոց ճշգրտությամբ: Կան Եվրամիության համապատասխան ստանդարտներ, որտեղ ասվում է, որ անձը հաստատող ցանկացած, մանավանդ` ճամփորդական փաստաթուղթ պետք է լինի պաշտպանված ըստ մի շարք ցուցանիշների: Հիմնվելով այս ամենի վրա, ընդունվեցին օրենքներ նույնականացման քարտի (այսպես կոչված ID) մասին, որը օգտագործվելու է ՀՀ տարածքում նախկին` սովորական անձնագրի փոխարեն, և ՀՀ տարածքից դուրս օգտագործելու համար նախատեսված անձնագրի վերաբերյալ: Վերջինս կներառի էլեկտրոնային պահոց, որի մեջ կլինեն աջ և ձախ ցուցամատերի մատնահետքերը և թվային լուսանկար: Սա արդեն հնարավորություն կտա, որպեսզի ՀՀ քաղաքացիների` արտերկիր մուտքի արտոնագրի (վիզայի) ստացումը դյուրացվի, ինչը, իհարկե, ողջունելի կլինի:
Օգտվելով առիթից, կցանկանայի նաև մի փոքր անձնագրային և վիզաների բարեփոխումների մասին:
Այստեղ նույնպես մեծ աշխատանքներ են կատարվել:
Կարդացեք նաև
Օրինակ, անձն իր հաշվառման տարածքը փոխելու համար արդեն կարող է այցելել միայն նոր վայրը, և դրանով իսկ մյուսի գրանցումից ավտոմատ կերպով դուրս գալ: Բարելավվել են նաև աշխատանքային պայմանները, մասնավորապես, վերանորոգվել են 4 ստորաբաժանումներ, իսկ Մաշտոցի պողոտայում ընդանրապես մի նոր շենք է կառուցվել՝ ընդ որում, այս բոլորն իրականացվել է արտաբյուջետային միջոցների հաշվին: Բոլոր աշխատակիցները, ներառյալ բաժանմունքի պետին, ներկայումս նստած են մեկ հադլիճում, և ես էլ on-line ռեժիմով, համակարգչի էկրանի վրա տեսնում եմ (ցույց է տալիս. Գ. Խ.), թե ինչ է կատարվում բոլոր ստորաբաժանումներում: Կոռուպցիոն ռիսկերը նվազեցնելու, նաև՝ գործերը արագացնելու համար, բաժանմունքներում տեղադրել ենք հատուկ տերմինալներ, որոնց միջոցով տեղում արվում են բոլոր անհրաժեշտ վճարումները:
Նաև մենք նոր համակարգ ենք ներդրել, որի շնորհիվ, հավաքելով 090 007 007 հեռախոսահամարը, քաղաքացին ամիջապես տեղեկություններ է ստանում, թե, ասենք, ինչպիսի փաստաթղթեր են հարկավոր անձնագիր, կամ, ասենք, մուտքի արտոնագիր ստանալու համար, ընդ որում երեք լեզուներով` հայերեն, ռուսերեն, անգլերեն:
Պարզեցված են ընթացակարգերը մուտքի արտոնագիր կամ քաղաքացիություն ստանալու համար, ժամկետներն են կրճատված, պարզեցված է նաև փաստաթղթերի ցանկը, որը անհրաժեշտ է անձնագիր ստանալու համար` ցուցակից հանված են նախկինում եղած շուրջ 6 փաստաթուղթ:
Գուրգեն ԽԱԺԱԿՅԱՆ
