«Էնքան սիրուն կառույց էր` մեծ դահլիճով ու բեմով: Ճանաչված արտիստները համերգներով միշտ գալիս էին ու ելույթ ունենում այնտեղ, համ էլ հնդկական կինոներ էինք նայում մեծ էկրանով, – ասում է Արշալույս համայնքի բնակիչներից մեկը համայնքի մշակույթի տան մասին, ապա ավելացնում,- էդ օրերը մեզ համար տոն էին, դասական շորեր էինք հագնում ու ընկերներով, զույգերով գնում հանգիստը վայելելու»:
Այսօր Արմավիրի մարզի Արշալույս գյուղի մշակույթի տունը թեև դրսից բարեկարգ է, բայց ներսից ամբողջությամբ քանդված է: Այն կառուցվել է 1935 թ.-ին և մոտ 20 տարի է ծառայել նպատակին, ապա աստիճանաբար խարխլվել:
«էս շատ մեծ շինություն է, սրա կառուցման համար երկար ժամանակ ու որակով աշխատանք էր պետք: Բայց այդ գործընթացը շատ արագ կատարվեց, հետո էլ տանիքը փայտից էր: Ըտենց կամաց-կամաց խոնավությունից սկսեց փչանալ»,-ասում է շինարարներից մեկը, ով մասնակցել է մշակույթի տան կառուցման աշխատանքներին:
Կառույցի հարևանությամբ ապրողների խոսքով մի քանի տարի առաջ` ամեն օր, գյուղի երեխաները մտնում էին այնտեղ ու գիպսեր տանում:
«Մի անգամ մտանք, որ կավիճ վերցենք, վերևից մի հատ մեծ գիպս ընկավ գլխներիս», – հիշում է Վարդգեսը: Այժմ այդ խնդիրը լուծվել է` քարե պարիսպներով փակվել են շինության մուտքերը. դա արվել է համայնքի միջոցներով:
Ներկայումս նկուղի բնակչությունը չունի աշխատանքից հետո` ազատ ժամերին, հանգստանալու և ժամանց կազմակերպելու վայր:
«Ժամանակակից կառույց դարձնելու համար շատ աշխատանք ու ֆինանսներ են պետք. միայն համայնքի միջոցներով հնարավոր չէ վերանորոգել մշակույթի տունը»,- ասում է գյուղապետ պարոն Զարզանդ Գրիգորյանը: Նրա խոսքով՝ ներկայումս կա ծրագիր, որի նպատակն է աշխուժացնել մշակութային կյանքը համայնքում, դահլիճ տրամադրել ավագանու նիստերի անցկացման, տոնական օրերին մասսայական միջոցառումներ կազմակերպելու համար, իսկ գլխավոր նպատակը համայնքի բնակիչների կրթության և հոգևոր զարգացման համար պայմաններ ապահովելն է:
«Այդ ծրագրի շրջանակներում էլ հենց նախատեսվում է մշակույթի տան վերանորոգումը, որի համար կոնկրետ ժամկետներ նշված չեն», – ասում է պարոն Գրիգորյանը, ում խոսքով մշակույթի տունը կունենա նաև շախմատի, նարդու և այլ խաղերի համար նախատեսված սենյակներ:
Մարգարիտա Ղազարյան
