Հայ ազգային կոնգրեսի ներկայացուցիչ Արշակ Բանուչյանից, որը նաեւ մեծամասնականով առաջադրված է թիվ 11 ընտրատարածքում, «Առավոտը» հետաքրքրվեց, թե ունի՞ բավարար թվով վստահված անձինք, որոնք տեղամասերում սրտացավորեն կհետեւեն ընտրությունների ընթացքին` թույլ չտալով խախտումներ եւ կեղծիքներ: Հիշեցնենք, որ երեկ կայացած ասուլիսում «Ընտրությունը քոնն է» հասարակական կազմակերպության նախագահ Հարություն Համբարձումյանը կարծիք էր հայտնել , որ ներկայիս Ընտրական օրենսգրքի տված հնարավորություններով` սրտացավ եւ գրագետ վստահաված անձինք ունենալու պարագայում որեւէ կեղծիք կատարելը, անգամ ընտրացուցակների հետ ինչ-ինչ խաղեր տալը դառնում է գրեթե անհնարին:
Պարոն Բանուչյանը վստահեցրեց, որ իրենք ամեն ընտրատեղամասում ունեն անգամ երկուական վստահված անձինք` մեկը ՀԱԿ-ի կողմից, մեկը` անձամբ իր` որպես մեծամասնական թեկնածու, որոնց ձեռքերում կան ընտրացուցակներում հայտնաբերված անճշտությունները կամ կասկածելի տվյալները, եւ որոնք ուշադիր հետեւելու են ողջ գործընթացին, սակայն, ըստ պարոն Բանուչյանի` բուն տեղամասերում հենց ընտրության օրը դժվար թե որեւէ խախտումներ լինեն` «այն ինչ լինելու է, արդեն կատարվում է դրսերում: Երեկվանից, երեկ չէ առաջին օրվանից սկսել են փող բաժանել, դա է հիմնականը»:
Մանրամասները` տեսանյութում:
Մելանյա ԲԱՐՍԵՂՅԱՆ
