Ըստ բաքվեցի վերլուծաբանների` Ադրբեջանի ջախջախիչ պարտություն է կրում այդ պատերազմում։
«Եվրատեսիլ - 2012»-ը Ադրբեջանում անցկացնելու որոշման դեմ բողոքի ցույց Բաքվում, 22-ը ապրիլի, 2012թ.
Պաշտոնական Բաքուն եւ Բեռլինը դիվանագիտական սկանդալի շեմին են:
Ադրբեջանական իշխանությունները պնդում են, որ Գերմանիան «Եվրատեսիլ» մրցույթից հաշվված օրեր առաջ հակաադրբեջանական քարոզչական արշավ է նախաձեռնել, որի նպատակն է խաթարել երկրի ներքին կայունությունն ու միջազգային ասպարեզում ունեցած «բարի համբավը»:
Գերմանիայի իշխանությունների դեմ այս հարձակումները սկիզբ առան Ադրբեջանի իշխող կուսակցության պաշտոնաթերթ «Ենի Ազերբայջան» պարբերականում: Իշխանամետ այս թերթը մեկ շաբաթվա ընթացքում երկու հոդված հրապարակեց, որոնցում պնդում էր, թե Բաքվում Գերմանիայի դեսպան Հերբերտ Քվելեն ադրբեջանական ընդդիմության առաջնորդների հետ հանդիպման ընթացքում իբր կոչ է արել երկրի նախագահ Իլհամ Ալիեւի ընդդիմախոսներին միավորվել եւ միասնական ճակատով հանդես գալ իշխանությունների դեմ:
Գերմանիայի դեսպանությունը ստիպված էր հերքել այս տեղեկությունները: Սրան զուգահեռ` գերմանական մի շարք թերթերում հրապարակումներ հայտնվեցին Ադրբեջանում մարդու իրավունքների խախտումների մասին:
Այս ամենը բավարար էր, որպեսզի հակագերմանական հայտարարությունները մամուլի էջերից տեղափոխվեն Ադրբեջանի խորհրդարան։
Իշխող «Ենի Ազերբայջան» կուսակցության փոխնախագահ, Միլի մեջլիսի պատգամավոր Ալի Ահմեդովը պնդում էր. – «Գերմանիայում գործող որոշ ուժեր մի նոր մարտավարություն են որդեգրել, որի նպատակն է խաթարել Ադրբեջանի վարկը: Բաքվում Գերմանիայի դեսպանը այդ մարտավարության բաղկացուցիչ մասն է»:
Բաքվեցի անկախ վերլուծաբանները, սակայն, ընդգծում են, որ չնայած հնչող կտրուկ հայտարարություններին` Ադրբեջանը ջախջախիչ հաշվով պարտություն է կրում լրատվական պատերազմում:
Քաղաքագետ Իլգար Մամեդովը, օրինակ, գրել է. – «Եթե այսօր համեմատաբար անաչառ եվրոպացիները, որոնց պարզապես հետաքրքրել է «Եվրատեսիլ» մրցույթը, հանկարծ իրենց համար հայտնաբերում են Ադրբեջանում տիրող քաղաքական համակարգի ողջ անպարկեշտ պատկերը, ապա պատկերացրեք ինչ կլինի, երբ հանկարծ Հայաստանի հետ պատերազմ սկսվի։ Այդ դեպքում այսօրվա մեդիա-դժոխքը մեզ պարզապես նախավարժանք կթվա»:
Գեւորգ Ստամբոլցյան
«Ազատություն» ռադիոլայան
