Հրազդանում ընտրողների հետ հանդիպմանը Հանրապետական կուսակցության նախագահը ներկայացնելով իր քաղաքական թիմի՝ ՀՀԿ-ի նոր ծրագիրն ու առաջիկա անելիքները, անդրադարձել է նաև հրապարակային գործունեություն վարող և մշտապես բոլորի ուշադրության կենտրոնում գտնվող իշխանության նկատմամբ հաճախ անարդար քննադատությանն ու քննադատողների նկատմամբ հանդուրժողական և հարգալից վերաբերմունքի ցուցաբերման կարևորությանը:
«Իշխանություն լինելը պատվաբեր, բայց դժվարին պարտականություն է: Դժվարին է, քանի որ տարիներ շարունակ ամեն մի քայլ, ամեն մի գործողություն հրապարակային է, գտնվում է բոլորի ուշադրության կենտրոնում: Ավելին, այն ամենայն մանրամասնությամբ ուսումնասիրության, վերլուծության և շատ հաճախ նաև քննադատության առարկա է դառնում:
Երբեմն նաև անարդար քննադատության է ենթարկվում ու ինքդ քեզ ասում ես՝ լա՛վ, արդյո՞ք այդ քննադատող մարդիկ իսկապես որևէ դրական բան չե՞ն տեսնում, թե՞ չեն ցանկանում ուղղակի տեսնել: Երբեմն ինքդ քեզ ասում ես՝ լա՛վ, ինչո՞ւ են նման անազնիվ հարձակումներ կատարում, բայց անմիջապես ինքդ քեզ ասում ես՝ եթե իշխանություն ես, պիտի քննադատության ենթարկվես:
Կարդացեք նաև
Պիտի դիմանաս՝ առանց նեղանալու, որքան էլ անարդար, վիրավորական ու տհաճ լինի երբեմն այդ ամենը»,-ընտրողների հետ հանդիպմանն ասել է ՀՀԿ նախագահը:
Հրազդանցիների հետ Սերժ Սարգսյանը խոսել է նաև ուժեղ և պաշտպանված պետության մասին. «Հայաստանի Հանրապետությունն արդեն կայացած, ուժեղ և պաշտպանված երկիր է: Այդպիսին է, քանի որ հանուն դրա տարիներ շարունակ բոլորս միասին տքնաջան ու հետևողական աշխատանք ենք կատարել:
Այդպիսին է, քանի որ մեր ժողովուրդը տարիներ շարունակ իրենից կտրել, դրել է մեր անվտանգության վրա: Այդպիսին է, քանի որ բոլորս միասին ապացուցել ենք, որ Արցախը եղել է, կա ու լինելու է հայկական: Ապացուցել ենք և ապացուցում ենք բոլորս միասին: Ապացուցում ենք Ստեփանակերտում և Մարալիկում, Կապանում և Ալավերդիում, Վանաձորում և, իհարկե, Հրազդանում:
Մեր երկրում ամեն տեղ՝ հենց նույն Հրազդանում, ես ունեմ մարտական ընկերներ: Նոր բացում էինք Մարմարիկի ջրամբարը և մեկը մոտեցավ, ասաց՝ բարև կամանդիր, ասացի՝ բարև զինվոր: Բոլոր տեղերում, իրոք, մարտական ընկերներ ունեմ՝ չնայած նրան, որ նրանցից ոմանք փոխում են իրենց սկզբունքները: Աստված իրենց հետ: Մենք մեր մարտական ընկերների թափած արյունը երբեք չենք թողնի, որ իզուր անցնի:
Մենք պիտի հիշենք, որ ազատամարտում հաղթել ենք, բայց պատերազմի հաղթանակը պիտի դեռ ամրագրենք՝ հաշտության պայմանագիր կնքելով: Ուստի և պիտի ապացուցենք մեր կյանքով ու գործով՝ ամեն վայրկյան, որ մենք արժանի ենք այդ հաղթանակին: Պիտի ապացուցեցինք, որ մարտի դաշտից հետ չեկած տղերքի արյունը իզուր չի հեղվել:
Այդ հաղթանակին արժանի լինելու համար մենք ամեն վայրկյան գործով պիտի ապացուցենք, որ մեր ստեղծած պետությունը ծառայում է ժողովրդին և յուրաքանչյուր մարդուն»:
ՀՀԿ մամուլի եւ հասարակայնության հետ կապերի ծառայություն
