Այսօր, «Ժառանգության» կենտրոնական նախընտրական շտաբում տեղի ունեցավ ԱԺ «Ժառանգություն» խմբակցության պատգամավոր Անահիտ Բախշյանի «Հաշվետու եմ» գրքի շնորհանդեսը: Գիրքը ներկայացնում է ԱԺ-ում նրա հնգամյա գործունեության հաշվետվությունը եւ նվիրված է ամուսնու՝ Յուրի Բախշյանի ծննդյան 65-ամյակին:
500 տպաքանակով լույս տեսած գիրքը ներառում է Ա. Բախշյանի հոդվածները, հայտարարություններն Ազգային Ժողովի ամբիոնից եւ «Խորհրդարանական ժամ» հաղորդման շրջանակներում, ինչպես նաեւ` կառավարությանն ուղղված հարցադրումները:
Ինչպես լրագրողների հետ զրույցում նշեց Ա. Բախշյանը, գիրքն ընդգրկում է իր կատարած աշխատանքի 20 տոկոսը միայն. «Ինձ հաճախ հարցնում են, թե արդյոք պատգամավորը պետք է աներ այսինչ բանը, կամ ասում են ` «դուք պատգամավո՞ր եք, թե՞ շտապօգնություն»: Ես էլ ասում եմ` պատգամավորն ավելին է, քան «շտապօգնությունը»: Նա պետք է լինի այնտեղ, ուր իրեն սպասում են»:
Կարդացեք նաև
Գիրք հրատարակելու գաղափարը «Ժառանգության» պատգամավորին առաջարկել է «Ժառանգություն» եւ «Ազատ դեմոկրատներ» կուսակցությունների միասնական նախընտրական շտաբի մամուլի խոսնակ Հովսեփ Խուրշուդյանը: Առաջարկից հետո առաջնահերթ հավաքագրվել են Ա. Բախշյանի մասին իր գործընկերների, կուսակից ընկերների եւ աշակերտների կարծիքները. «Այդ առումով գիրքն ինձ համար շատ կարեւոր է: Ես հուզվել եմ այդ կարծիքները կարդալուց»,- ասաց Ա. Բախշյանը:
Նա նշեց, որ իր կայացման գործում մեծ է հանգուցյալ ամուսնու` Յուրի Բախշյանի դերը. «Նա է ինձ ոգեշնչել: Ես մինչ օրս հավատարիմ եմ իմ երջանկությանն ու նրա նկատմամբ ունեցած գգացումներին, չնայած այն հանգամանքին, որ ինձանից 9 ամիս պահանջվեց` հասկանալու համար, որ նա սիրում է ինձ»:
Շնորհանդեսին ներկա «Ժառանգություն» խմբակցության ղեկավար Ստյոպա Սաֆարյանը կարեւորեց Ա. Բախշյանի բազմամյա մանկավարժական փորձը. «Նրա աշակերտները դարձել են լավ քաղաքացիներ: Մենք իրար հետ ավելի շատ ժամանակ ենք անցկացնում կուսակցության ներսում, քան մեր ընտանիքների հետ: Նա ոչ թե ԱԺ-ի, այլ ժողովրդի պատգամավորն է»:
Իսկ «Ժառանգություն» խմբակցության պատգամավոր Արմեն Մարտիրոսյանի խոսքով` Ա. Բախշյանին հատուկ է մայրական հոգատարությունը եւ խստապահությունը:
Լուիզա ՍՈՒՔԻԱՍՅԱՆ
