Aravot.am-ի հետ զրույցում ՀԱԿ համամասնական ցուցակով առաջադրված ՍԴՀԿ ատենապետ Լյուդմիլա Սարգսյանը նպատակահարմար համարեց քաղաքականության մեջ ոչինչ չբացառել: ՀԱԿ-ը մշտապես հայտարարում է, թե ՀՀԿ-ն մայիսի 6-ի խորհրդարանական ընտրություններում ունի 3 տոկոսի շանսեր, ուստի Լ. Սարգսյանին խնդրեցինք գնահատել նաև ԲՀԿ-ի շանսերը: Նա պատասխանեց. «ԲՀԿ-ն ավելի շատ շանսեր ունի, քան ՀՀԿ-ն: Ուր գնում ենք՝ տեսնում ենք, որ ԲՀԿ-ն ավելի շատ համակիրներ ունի, իսկ ՀՀԿ-ն համակիրներ չունի, այն պարզապես ունի ադմինիստրատիվ լծակներ, որոնց միջոցով բերման է ենթարկում ՀՀ ամեն մի քաղաքացու»:
Aravot.am-ը տիկին Սարգսյանից հետաքրքրվեց՝ արդյոք իրենք չեն մոռացե°լ, որ ԲՀԿ-ն դեռ ՀՀԿ-ի հետ կոալիցիայի մեջ է, ուստի մտավախություն չկա°, որ ԲՀԿ-ն մի օր կրկին վերադառնալու է դեպի ՀՀԿ: Լ. Սարգսյանը նշեց. «Նրանք բոլորը մեր մրցակիցներն են, բայց քանի որ ԲՀԿ-ն էլ խնդիր ունի ձայներ պահելու և արդար ընտրություններ ապահովելու, քանի որ զգում է, որ ձայներ ունի, մենք էլ այդ խնդիրն ունենք, ուստի ինչո°ւ այս պահին չահամգործակցենք: Մենք «Բարգավաճ Հայաստան» կուսակցության հետ այս պահի համար ենք համագործակցում, իսկ հետագայի համար ոչինչ չեմ բացառում նաև «Ժառանգության» և Դաշնակցության մասով»: Aravot.am-ը լսեց նաև տիկին Սարգսյանի մեկնաբանությունը այն տեսության մասին, ըստ որի՝ ՀՀԿ-ն առաջիկայում ՕԵԿ-ին փոխարինելու է «Ժառանգությամբ». «Կուզեի, որ այդպես չլիներ, սակայն ոչինչ չեմ բացառում»:
Տաթև ՀԱՐՈՒԹՅՈՒՆՅԱՆ
