Լույս տեսավ արդարադատության նախարարության քրեակատարողական հիմնարկի «Արգելված գոտի» ամսագրի 2-րդ համարը:
Հավատարիմ մնալով նախորդին, ամսագրի հին խորագրերը պահպանվել են՝ «Աշխարհի բանտերը», «Զավեշտալի պատժաձեւեր եւ օրենքներ», «Փշալարից անդին», «Քրեական խճանկար»…
«Քրեական խճանկարում» վերջին օպերատիվ տեղեկություններն են, որոնք տեղի են ունեցել քրեակատարողական հիմնարկներում: Մասնավորապես, թե ինչպես է «Դատապարտյալների հիվանդանոց» որդուն այցելության գնացող մայրն իր հետ տարել հեռուստացույցի ալեհավաք, որին ինչ-որ մեկը տիրացել է, կամ ինչպես է «Էրեբունի» քրեակատարողական հիմնարկ տեսակցության գնացած դատապարտյալին փոխանցվել կոնֆետ, իրականում՝ դեղահաբերով: Կամ՝ թե ինչպես է կանխվել «Նուբարաշենի» ցմահ ազատազրկվածների փախուստը: Ավելի մանրամասն: Նշանակվել է ծառայողական քննություն, որը դեռ շարունակվում է: Այս կարգի տեղեկատվությունը հրապարակելն իսկ մի քայլ է դեպի հրապարակայնություն:
Ամսագրում կա հետաքրքիր հարցազրույց Թուրքիայում թրաֆիքինգի համար դատապարտված մի կնոջից: «Սա երկրորդ դատվածությունս է: Ընկերուհուս պատճառով հայտնվեցի կանանց գաղութում: Առաջին անգամ ես մեղավոր էի, աղջիկներ եմ տարել Հայաստանից: …Բայց այս անգամ ինձ անարդար դատապարտեցին: …Հայաստանից ուղարկում էին, ես էլ նրանց դիմավորում եւ տեղավորել եմ իմ տանը»,- ասել էր դատապարտվածը:
«Դիմանկար» խորագրի տակ հարցազրույց էր տվել 33 գրքի հեղինակ, հանրահայտ բանաստեղծուհի Մետաքսեն:
Իսկ որ ամենահուզիչն է, երկրորդ համարում տեղ է գտել դատապարտյալի մանկահասակ երեխայի նամակը՝ գրած իր մորը. «Ես քեզ շատ եմ կարոտել: Երբ կլինի, շուտ վերջացնես ու գաս»:
Ռ. Մ.
«Առավոտ» օրաթերթ
