«Օրինաց երկիր» կուսակցության (ՕԵԿ) նախագահ Արթուր Բաղդասարյանն այսօր վանաձորցիներին կոչ արեց ջիգյարով մասնակցել ԱԺ ընտրություններին:
ՕԵԿ նախագահի համոզմամբ կուսակցությունը քարոզարշավի ընթացքում ներկայացնում է ոչ միայն խնդիրները, այլ նաեւ տալիս է դրանց լուծման ուղիները:
«Այսօր Հայաստանում ամենակարեւոր խնդիրը գործազրկությունն է: «Օրինաց երկիր» կուսակցությունը առաջարկում է Հայաստանում ստեղծել, հենց մեկ-երկու ամիս հետո, հատուկ պետական հանձնաժողով` մշակելու համար Հայաստանում աշխատատեղեր ստեղծելու ազգային ռազմավարություն: Մենք առաջարկում ենք երկրում աշխատատեղերի ստեղծման խնդիրը հռչակել պետության գերակա նպատակ եւ կոնկրետ ծրագրավորված մեխանիզմների գործադրման միջոցով Հայաստանի յուրաքանչյուր բնակավայրում ստեղծել աշխատատեղեր»,-վանաձորցիների հետ հանդիպման ժամանակ ասաց Արթուր Բաղդասարյանը:
Խոսելով մանր ու միջին բիզնեսի զարգացման անհրաժեշտության մասին` ՕԵԿ նախագահը նշեց, որ կուսակցության նպատակներից մեկն էլ Հայաստանում մանր բիզնեսի զարգացումն է:
Կարդացեք նաև
«Մենք Հայաստանում առաջարկում ենք ստեղծել մանր բիզնես, երկու, հինգ հոգի հիմնարկ բացեն, գնան վերելակ սարքեն, մյուսները աղբահանությամբ զբաղվեն, լինի մրցույթ: Պիտի այս համակարգը փոխվի, ազատականացվի: Հայաստանում պիտի լինի տնտեսական մրցակցություն, ազատություն: Հայաստանում չեն կարող գները էժան լինել, որովհետեւ այսօր լրջագույն խնդիր է փոքր եւ միջին բիզնեսի պաշտպանությունը»:
ՕԵԿ նախագահը խոսեց երկրում նորարարական փոփոխություններ կատարելու անհրաժեշտության մասին` նշելով, որ Հայաստանում շատ ոլորտներ կան, որ փոփոխությունների կարիք ունեն:
«Մենք առաջարկում ենք օրենքով սահմանափակել խոշոր սուպերմարկետների թիվը, առաջարկում ենք մեր երկրում մեծացնել անվճար կրթության ծավալները. մարդը, որ փող չունի, չի նշանակում, որ նրա երեխան պիտի անգրագետ մեծանա:Մենք առաջարկում ենք բոլոր սոցիալական խավերի հետ կապված հատուկ պետական քաղաքականություն, հոգատարություն ու մոտեցում, ամեն ինչը հնարավոր է անել միայն օրենքների միջոցով»,- ասաց Արթուր Բաղդասարյանը:
Անուշ ԲՈՒԼՂԱԴԱՐՅԱՆ
Վանաձոր
