«Այլեւս երբեք մեր հողում ընտրությունները չեն կուսակցականացվելու ու չեն կեղծվելու: Ով փորձի մայիսի 6-ին խաղ տալ Հայաստանի քաղաքացու իրավունքի, Սահմանադրության հետ, պատասխան է տալու ինձ հետ, կապ չունի՝ մենք խոսում ենք Սերժի, Գագիկի, Լեւոնի, Րաֆֆիի կամ քաղաքական այլ ուժի մասին, որովհետեւ մեզ մոտ թագավորելու է հայ մարդը»,- այսօր Արարատ քաղաքում բնակիչների հետ հանդիպման ժամանակ ասաց «Ժառանգություն» կուսակցության նախագահ Րաֆֆի Հովհաննիսյանը: «Ժառանգության» թեկնածու Զարուհի Փոստանջյանը ասաց, որ Հայաստանում չկա արդարություն ու եկամուտները բաշխվում են ոչ թե ըստ մարդու աշխատածի, այլ կախված նրանից, թե ինչքան մոտ ես բարձրաստիճան այս կամ այն պաշտոնյայի հետ, որքան մեծ են քո հնարավորությունները երկրի հարստությունները թալանելու հարցում: Նրա խոսքերով, քանի որ Հայաստանում իշխանությունները չեն ծառայում ժողովրդին, վերջին 20 տարում մոտ 1,5 միլիոն մարդ է լքել Հայաստանը, «Ժառանգությունն» այս անգամ գալիս է մեծ թիմով, ուժով, որը մեր երկրին բերելու է մեր ժողովրդի վերադարձը մոտակա 5 տարում»:
«Ժառանգության» համամասնական ընտրակարգով առաջադրված պատգամավորի թեկնածու Սուսաննա Մուրադյանն էլ ասաց, որ կառավարությունը ձախողվել է տնտեսական, սոցիալական, դատաիրավական համակարգում, ապա հավաքվածներին կոչ արեց կառավարության ներկայացուցիչների հետ հանդիպելիս ոչ թե նամակներ հանձնել ու ինչ-որ բան խնդրել, այլ պահանջել նրանց հրաժարականը:
Արարատի մարզում «Ժառանգություն» կուսակցությունը այսօր կավարտի իր մարզային քարոզարշավները:
Արփինե ՍԻՄՈՆՅԱՆ
