Ազատամարտիկ Ավետիս Խաչատրյանի հարեւաններն ու մարտական ընկերներն արդեն քանի օր ու գիշեր է հսկում են, որպեսզի
Երեւանի քաղաքապետարանի աշխատակիցները չքանդեն Նոր Նորքի Գյուլի Քեսյան 29 հասցեի մեկ հարկանի կիսակառույց շինությունը: Այն ճիշտ է` սեփականության վկայական չունի, բայց ազատամարտիկի միակ կացարանն է, որտեղ Ավետիսը կարող է ընտանիքի 9 անդամների հետ, որոնց թվում կան անչափահաս երեխաներ, ապրել:
Խաչատրյանները բիզնես սկսելու նպատակով ՎՏԲ բանկից վարկ են վերցրել, սակայն չկարողանալով բարձր տոկոսների ու հարկերի տակից դուրս գալ` բնակարանը կորցրել են: Այսօր նրանք իրենց նախկին բնակարանում վարձակալությամբ են բնակվում: Մի օր փողոցում չհայտնվելու համար, իրենց շենքի հարեւանությամբ, մոտ 50 քմ տարածքով նախկին խանութի տեղում, 4 պատ են շարել, որպեսզի ընտանիքը տեղափոխվի այդտեղ:
Շինությունն օրինականացնելու համար, արցախյան պատերազմի մասնակից «Վիտյա Այվազյան» ջոկատի հրամանատար Ավետիս Խաչատրյանը, որը նաեւ երկրապահ կամավորականների միության անդամ է, օրերս մոտեցել է իրենց համայնք ծառատունկի եկած Երեւանի քաղաքապետ Տարոն Մարգարյանին` խնդրելով ընդառաջել: «Մի քանի րոպե հետո քաղաքապետը եկավ տարածք եւ հրամայեց շինությունը քանդել, հողին հավասարեցնել»,- Aravot.am-ին պատմեց ազատամարտիկը:
Կարդացեք նաև
Հարեւանների խոսքերով էլ. «Ավետիս Խաչատրյանը ամբողջ Նոր Նորքում շատ հարգված անձնավորություն է, պետք լինի` կհավաքվենք, կգնանք քաղաքապետարանի մոտ ցույց կանենք: Նրա նման մարդուն է՞լ են զրկում 4 պատից: Նրա շնորհիվ ենք այսօր մենք ապրում: Ղարաբաղում կռվեց, որ այսօր անտուն մնա՞: Մեզ էլ ասում էր` հանրապետականներին հավատացեք, ձայն տվեք: Ո՞ւմ հավատանք, ինչի՞ն հավատանք: Հավատանք, որ ազատամարտիկի տունը քանդե՞ն»:
Հարեւաններն այնքան վրդովված էին ազգի հերոսի նկատմամբ նման վերաբերմունքից, որ վստահեցրին` «Պետք լինի տրակտորի տակ էլ կպառկենք, բայց որեւէ մեկին չենք թողնի, Ավոյի տունը քանդեն»:
Նելլի ԲԱԲԱՅԱՆ
Այս մասին ավելի մանրամասն կարդացեք վաղվա տպագիր «Առավոտում»:
