«Կրթության մասին» ՀՀ օրենքը սահմանում է, որ կրթական հաստատություններում արգելվում է քաղաքական եւ կրոնական քարոզչությունը, նման նպատակներով դահլիճների տրամադրումը եւ ուսուցչական կոլեկտիվների ներգրավումը սույն գործընթացում: Մինչդեռ նախորդ օրը, ՀՀԿ եւ ՀՀ նախագահ Սերժ Սարգսյանը` պատսպարվելով հորդառատ անձրեւից՝ նախընտրական քարոզչությունը Երեւանի Դավիթաշեն վարչական շրջանի բնակիչների շրջանում իրականացրեց թիվ 189 դպրոցի դահլիճում: Aravot.am-ի հարցին` ԿԸՀ-ն որեւէ կերպ կարձագանքի՞ ՀՀ նախագահի այս քայլին, ԿԸՀ նախագահ Տիգրան Մուկուչյանը հակադարձեց, որ խոսքն աշխատանքային ժամերի մասին է, իսկ այն ժամին, երբ նախագահը քարոզ էր անում՝ աշխատանքային չէր: Հավելեց նաեւ, որ խոսքը վերաբերում է այդ հաստատություններում աշխատողներին` իրենց լիազորություններն իրականացնելիս. «Դասատուն իրավունք չունի դասի ժամին զբաղվել քարոզչությամբ, ծնողական ժողով հրավիրել եւ քարոզչություն իրականացնել»: Այսինքն, ըստ ԿԸՀ նախագահի, Սերժ Սարգսյանը գործել է օրենքի սահմաններում:
Հետաքրքրվեցինք` դարձյալ օրենքի խախտում չէ՞, երբ նախագահը համատեղում է աշխատանքային այցերը եւ քարոզարշավը: Արդյոք դա չի՞ նշանակում պետական միջոցների ներդրում` կուսակցական քարոզարշավում եւ վարչական ռեսուրսի կիրառում: «Իհարկե` ոչ»,- եղավ Տիգրան Մուկուչյանի արձագանքը:
Նա նաեւ հավելեց. «Եթե այդ առնչությամբ լինի համապատասխան փաստ, կոնկրետ եւ փաստարկված, այն ժամանակ մենքկքննարկենք եւ դիրքորոշում կներկայացնենք: Ձեր հարցադրման պարագայում որեւէ կոնկրետ, փաստարկված բան չկա: Աշխատանքային այցը մի բան է, քաղաքական քարոզչությունն` այլ»:
Կարդացեք նաև
Նելլի ԳՐԻԳՈՐՅԱՆ
