«ԱԻՄ-ի՝ ընտրություններին չմասնակցելու համար ցավալ պետք չի, բայց եթե չլինի քաղաքական դաշտում ԱԻՄ-ը, լուրջ ցավալ է պետք »,- այսօր «Տեսակետ» ակումբում ասաց ԱԻՄ առաջնորդ Պարույր Հայրիկյանը: Իսկ թե ինչու չեն մասնակցում ընտրություններին՝ նա այսպես բացատրեց. «Միշտ չէ, որ շատ լավը լինելը նպաստում է, որ դու շատ ընկալելի լինես: Այսօր հայտնվել են վարձկանների կուսակցություններ: Կուսակցության գաղափարն այլ է, քաղաքական միավորին պետք է դուք սատարեք, ոչ թե կուսակցությունը պետք է ձեզ սատարի»: Aravot.am-ի հարցին՝ ինչպե՞ս եք վերաբերվում
Արտաշես Գեղամյանի, Հայկ Բաբուխանյանի, Խոսրով Հարությունյանի քայլին ՀՀԿ-ին միանալու՝ նա պատասխանեց, որ նրանք ինքնուրույն քաղաքական գործիչներ են. «Եթե ինձ համար նրանց բոլորի քայլերը հասկանալի լինեին, ես կլինեի նրանց կուսակիցը»:
Ըստ պարոն Հայրիկյանի, սա երկրորդ դեպքն է, երբ սպասվում է, որ Հայաստանում կարող են ընտրություններ լինել. «Առաջին անգամ 98-ի նախագահականն էր ինչ-որ չափով: Դա բացատրում եմ իշխող կուսակցությունների ընդգծված եվրոպական կողմնորոշում որդեգրելու պատրաստակամությամբ եւ այդ պատրաստակամությունն ապացուցելու ցանկությամբ: Ինչ վերաբերում է ոչ ընդգծված բաժանվող նվիրատվություններին, դրանք, իհարկե, մտահոգող են, դրանց դեմ պետք է արմատական պայքարել, պետք է մեր երկիրը նյութական գերիշխանությունից ազատել»:
ԱԻՄ առաջնորդին խնդրեցին կանխատեսել, թե որ ուժերը կմտնեն խորհրդարան: Ըստ Հայրիկյանի, «Ակնհայտ է, որ ՀՀԿ-ն պիտի անցնի, իշխանական ամբողջ համակարգը աշխատելու է այդ կազմակեպության օգտին: ԱԻՄ-ը միտ անցկացրել է հասարակական կարծիքի ճշգրտումներ, հիմա հարցումներ չենք անցկացնել, նայելով երեւում է , որ ՀՀԿ-ից բացի կանցնի ԲՀԿ-ն, իմ շատ սիրած ՀԱԿ-ը, եւ եզրագծին մոտ են ՕԵԿ-ը, Դաշնակցությունը, «Ժառանգությունը»»:
Կարդացեք նաև
ԱԻՄ-ականները ՀՀԿ-ի կողմնակիցն են, իսկ թե ում է ինքը՝ Հայրիկյանը ընտրելու, նա չհրապարակեց՝ ասելով, որ «Իմ լավ երկու ընկերները, իմանալով թե ես ում եմ համակրում, շատ խնդրեցին դա չասել»:
Հռիփսիմե ՋԵԲԵՋՅԱՆ
