Ապրիլի 27-ին «Ժառանգության» միասնական ցուցակի թեկնածուները հանդիպումներ ունեցան Լոռու մարզի մի շարք բնակավայրերում՝ Ալավերդում, Աքորում, Օձունում, Վանաձորում, Ստեփանավանում Տաշիրում եւ Սպիտակում: Ընտրողներին «Ժառանգության» ծրագիրն ու նպատակները ներկայացրին այդ կուսակցության առաջնորդ Րաֆֆի Հովհաննիսյանը, ԱԺ պատգամավոր Արմեն Մարտիրոսյանը, տնտեսագետ Արտակ Ղազարյանը, քաղաքագետ Ստեփան Հասան-Ջալալյանը, նախկին քաղբանտարկյալ Մասիս Այվազյանը եւ դեղագետ, Վանաձորում մեծամասնական ընտրակարգով առաջադրված թեկնածու Գառնիկ Սահակյանը:
Դիմելով վանաձորցիներին՝ «Ժառանգության» առաջնորդը հայտարարեց, որ ժամանակն է «դուրս գալ ողորմության շրջանակից» եւ թույլ չտալ, որ որեւէ մեկը ողորմություն առաջարկի: «Սա մեր երկիրն է, եւ մենք ասում ենք` բյուջեն կլցնենք հարկերով, հալալ մուտքերով, եւ այդ ողորմությունը կվերածվի ձեր իրավունքի, ձեր աշխատավարձի, կենսաթոշակի ու նպաստի: Եվ ոչ մեկը չի գալու ձեր երեխաների եւ թոռների ապագան մի քանի հազար դրամով կամ մուրաբաներով փոխարինելու»,- ընդգծեց Րաֆֆի Հովհաննիսյանը:
Նա նշեց նաեւ, որ հայ մարդու, Հայաստանի ապագան որոշվելու է մայիսի 6-ին: «Մայիսի 6-ին` առանց որեւէ այլեւայլության, անաղմուկ, մենք որոշելու ենք այդ ապագան Աստծո հայացքի տակ, սահմանադրական պահանջով, որոշելու ենք, թե ինչպիսին պետք է լինի վաղվա Վանաձորը: Ուրեմն մայիսի 6-ին եկեք միասին որոշենք»,- ասաց Րաֆֆի Հովհաննիսյանը:
Վանաձորցիներին իր խոսքն ուղղեց նաեւ համամասնական ցուցակի անդամ Գառնիկ Սահակյանը, ով մասնավորապես անդրադարձավ պետական բյուջեի անարդյունավետ օգտագործմանը: «Պետական գնումների գործընթացը պետք է զերծ պահել կոռուպցիայից»,- ասաց Սահակյանը:
Կարդացեք նաև
ԱԺ պատգամավոր Արմեն Մարտիրոսյանն Ալավերդում հանդես եկավ առաջարկությամբ` համեմատել այս 5 տարիների ընթացքում «Ժառանգության» կատարած աշխատանքները եւ մյուս կուսակցությունների գործելաոճը ընտրարշավից առաջ. «2007-ին մենք ասացինք՝ տեր ենք եւ անցած 5 տարում ապացուցեցինք մեր քաղաքացիներին, որ չենք նահանջել մեր խոսքից, միշտ կանգնած ենք եղել ժողովրդի կողքին` պաշտպանելով շարքային քաղաքացու շահերը»,- նշեց Մարտիրոսյանը:
Իսկ այսօր` ապրիլի 28-ին, «Ժառանգության» նախընտրական թիմը հանդիպումներ կունենա Երեւանում. Նոր Նորքի Գայի արձանին հարող տարածքում՝ ժ. 13-ին, Ավան-Առինջ թաղամասի Ընտանիքի այգում՝ ժ. 15-ին, Շենգավիթի Գ. Նժդեհի հրապարակում՝ ժ. 17-ին:
«Ժառանգության» նախընտրական շտաբի լրատվական ծառայություն
