Կենտրոնական ընտրական հանձնաժողովն այսօր ընտրական գործընթացներով հետաքրքրված հասարակական կազմակերպությունների ներկայացուցիչներին հրավիրել էր քննարկման: Վերջին պահին հանձնաժողովը որոշել էր թույլ չտալ լրատվամիջոցներին լուսաբանել: Թե ինչ քննարկվեց փակ դռների հետեւում, քննարկման ավարտից հետո պատմեցին հ/կ-ների ներկայացուցիչները:
«Տիգրան Մուկուչյանը նախ ներկայացրեց հիմնական վիճակագրությունը, թե քանի թեկնածու կա գրանցված, քանիսն են ինքնաբացարկ ներկայացրել, հետո սկսվեց հարց ու պատասխանը: Ինձ համար ամենակարեւոր հարցը, որի պատասխանը տրվեց հետեւյալն էր՝ թույլատրվա՞ծ է ընտրողին նկարել իր իսկ քվեաթերթիկը բջջային հեռախոսով, եթե՝ ոչ ինչ իրավասություն ունի տեղամասային հանձնաժողովը եւ մյուս պատկան մարմինները: Հանձնաժողովի նախագահ Տիգրան Մուկուչյանը նշեց, որ մայիսի 3-ին կլինի պաշտոնական հայտարարություն եւ հույս հայտնեց, որ այդ հայտարաությունը էապես կազդի նրանց վրա, որոնք այդպիսի մտադրություն ունեն»,- պատմեց դիտորդական առաքելություն ստանձնած Ալեքսանդր Շագաֆյանը: Մանրամասները դիտեք տեսանյութում:
Քննարկմանը մասնակցելու էին եկել ԵԱՀԿ երեւանյան գրասենյակի ու դեսպանատների ներկայացուցիչներ: Սակայն նրանք հրաժարվեցին ինչ-որ բան պատմել կամ գնահատականներ տալ:
Արփինե ՍԻՄՈՆՅԱՆ
Կարդացեք նաև
