Գավառի արվեստի դպրոցը հյուրընկալեց Մոսկվայի «Ալեքսեվսկիյ» մանկապատանեկական կենտրոնի սաներին` սոլիստ Վարվարա Մանթաշեվայի գլխավորությամբ:
Հայաստան ժամանած մանկական պատվիրակության կազմում էին 7 սաներ: Դպրոցում ազգությամբ ռուս սաները հանդես եկան հայ ժողովրդի կողմից սիրված հին ռուսական երգերի կատարմամբ: Ռուս սաների շուրթերից սահուն հայերենով հնչեցին «Ով սիրուն-սիրունը» եւ «Արմենիա» երգերը:
Միջոցառումը մեկումեջ համեմվում էր Գավառի արվեստի դպրոցի սաների պարային ու երաժշտական կատարումներով:
Ինչպես «Առավոտին» հաղորդեց Վարվարա Մանթաշեվան` 1981-91 թթ նա եղել է Գավառի երաժշտական դպրոցի հիմնադիրներից մեկը՝ ուսմասվարը, այնուհետեւ` տնօրենը:
Կարդացեք նաև
«Արմատներս սերում են Թիֆլիսից, բայց ես հոգով ու սրտով կապված եմ Հայաստանին, Գավառին եւ միշտ ջանացել եմ, որ իմ աշակերտները ճանաչեն ու գնահատեն հայի իսկական արժեքն ու մարդկային որակները: Նրանք այնպես սրտանց ու հոգով են երգում հայերեն երգերը, լսում հայ ժողովրդի պատմությունը»,- ասաց երգի մասնագետ Վարվարա Մանթաշեվան:
Մանկապատանեկան կենտրոնի անդամները եղել էին նաեւ Սարդարապատում, այնտեղ էլ հանդես եկել կատարումներով:
Գաղափարի հեղինակը հայտնեց նաեւ, որ այցելության ողջ ծախսերը հոգացել են իր աշակերտների ծնողները:
Պատվիրակների կազմում էին սաների ծնողները, ովքեր տպավորված էին Հայաստանով, Գավառով, հայ ժողովրդի ջերմությամբ ու տաղանդով:
Այնուհետեւ հանձնվեցին փոխադարձ նվերներ եւ պատվոգրեր: Կնքվեց բարեկամության դաշինքը` հաջորդ հանդիպումը Մոսկվայում ունենալու ակնկալիքով:
Անի ՊՈՂՈՍՅԱՆ
