Ապրիլի 25-ին Նոյեմբերյան քաղաքում Սերժ Սարգսյանի նախընտրական հանդիպման ժամանակ նախագահի թիկնապահների անդամներից մեկը հրել է կողբեցի հաշմանդամ ազատամարտիկ Վովա Երկնափեշյանին: Վերջինս «Առավոտի» թղթակցին ասաց, որ ընկնավորությամբ հիվանդ է, ցանկացած պահի կարող է մահանալ, նա իր առողջության հարցով նախագահից օգնություն էր հայցում: Նոյեմբերյանցի մի ազատամարտիկ էլ վեճի բռնվեց Սերժ Սարգսյանի անվտանգության ծառայության աշխատակցի հետ այն պատճառով, որ թիկնապահը նրան կարգադրում էր «հեռու քաշվել»: Ազատամարտիկն ասաց, որ այս հողը, սահմանն իրենք են պաշտպանել, եւ ոչ ոք իրավունք չունի այնտեղից իրեն հեռու վանելու: Իր ելույթից հետո երկրի նախագահը համբերատար լսում էր առողջական եւ այլ խնդիրներ ունեցող մարդկանց, ովքեր կարողացել էին հայտնվել Սերժ Սարգսյանի ճանապարհին: ՀՀ անկախության տարիներին երկրի նախագահի թիկնազորի անդամների թիվը բազմապատկվել է: Ժողովրդի հետ հանդիպումների ժամանակ Լեւոն Տեր-Պետրոսյանի թիկնապահները գրեթե չէին երեւում, Ռոբերտ Քոչարյանի օրոք նրանց թիվն ավելացավ, սակայն նրանք աչք չէին ծակում: Սերժ Սարգսյանի թիկնազորը բազմամարդ է, նախագահին լուսանկարելու ժամանակ միշտ կադրում հայտնվում են նրա թիկնապահները: Վերջիններիս թիվը,ժողովրդի հետ նրանց պահվածքը, ինչպես նաեւ նախագահական ավտոշարասյան մեծ երկարությունը հարուցում է տավուշցիների դժգոհությունը:
Ոսկան Սարգսյան
