Այսօր ԵԱՀԿ երեւանյան գրասենյակի նախաձեռնությամբ տեղի ունեցավ աշխատաժողով՝ նվիրված միջազգային եւ ազգային օրենսդրությամբ ամրագրված փոքրամասնությունների իրավունքներին եւ հասարակության շրջանում դրանց վերաբերյալ իրազեկության բարձրացմանը: Մասնակիցներին ներկայացվեց ազգային փոքրամասնությունների իրավունքներին վերաբերող փաստաթղթերի ընտրանին, որը պատրաստվել է ԵԱՀԿ երեւանյան գրասենյակի կողմից՝ ՀՀ արտգործնախարարության եւ Կառավարության Ազգային փոքրամասնությունների եւ կրոնի հարցերի վարչության հետ համատեղ:
ՀՀ արտգործնախարարության միջազգային կազմակերպությունների վարչության պետ Վահրամ Կաժոյանը նշեց, որ մարդու իրավունքների պաշտպանության գործում նախարարությունը միջազգային ասպարեզում ակտիվ գործունեություն է ծավալում. «Դրա մեջ են մտնում Հայաստանի բոլոր քաղաքացիները՝ անկախ կրոնական եւ ազգային պատկանելությունից: Մենք գիտակցում ենք, թե ինչ դժվար է լինել ազգային փոքրամասնություն, քանի որ հայերն էլ դարերի ընթացքում անցել են դրա միջով»: Պարոն Կաժոյանը հավելեց, որ կարեւոր է Հայաստանում ազգային փոքրամասնությունների մշակութային ժառանգության պահպանումն ու զարգացումը. «Նույնը չենք կարող ասել մեր հարեւան երկրների պարագայում, որտեղ ոչնչացվում են հայկական հուշարձանները: Իսկ մեզանում 2006թ-ին կանգնեցվեց հրեաների հոլոքոստին, վերջերս էլ՝ ցեղասպանության զոհ դարձած ասորիների հիշատակին նվիրած հուշարձաններ»:
ԵԱՀԿ երեւանյան գրասենյակի մարդու իրավունքների ծրագրի ղեկավար Վլադիմիր Չունտուլովը նշեց, որ պետական մարմինների եւ ՀՀ նախագահի աջակցությամբ ազգային փոքրամասնությունների իրավունքների պաշտպանության հարցին վերջին շրջանում մեծ կարեւորություն է տրվում:
ՀՀ կառավարության աշխատակազմի ազգային փոքրամասնությունների եւ կրոնի հարցերի վարչության պետ Վարդան Ասցատրյանը հայտնեց, որ ազգային փոքրամասնությունների իրավունքների պաշտպանությունը պետք է իրականացվի ոչ միայն վերջիններիս, այլեւ հասարակության կողմից. «Կյանքի փորձն է ցույց տալիս, որ իրավունքն անհրաժեշտ է իմանալ: Մենք շարունակելու են հաղորդակցությունը ազգային փոքրամասնությունների ներկայացուցիչների հետ՝ պարբերաբար նրանց ներկայացնելով օրենսդրական դաշտի փոփոխությունները»:
Կարդացեք նաև
Ազգային փոքրամասնությունների իրավունքներին վերաբերող փաստաթղթերի ընտրանին հասանելի է նաեւ էլեկտրոնային տաբերակով՝ ԵԱՀԿ կայքում:
Լուիզա ՍՈՒՔԻԱՍՅԱՆ
