Այսօր Դեմոկրատական կուսակցության առաջնորդ Արամ Սարգսյանի Ազատան ոտք դնելուն պես, նրա հետ զրուցելու եկած գյուղացիներից մեկն ասաց . «Սահակյան ջան, միավորվեք պրծնենք էլի , անունն ի՞նչ եք դրել, որ էսքան կուսակցություն եք ստեղծել»: Պարոն Սարգսյանը ուղղելով, որ իր ազգանունը Սահակյան չէ, նեղսրտեց . «Միավորվելով հո չէ, ես հիմա գնամ ո՞ւմ հետ միավորվեմ: Նախորդ ընտրություններին 23 կուսակցություն էր մասնակցում, այսօր 9-ն են , սա նշանակու՞մ է, որ բավականին կրճատվել են: Չարենցը ժամանակին ասել է լավ, հանճարեղ խոսքերը. «Ով հայ ժողովուրդ , քո միակ փրկությունը հավաքական ուժի մեջ է», ինքը դրա մեջ անհամեմատ ավելի խոր իմաստ է դրել, չէ՞, հո նա չի՞ ասել ստորի, չարի, թալանչու, սրա հետ էլ, նրա հետ էլ համախմբվի: Էդպես ո՞նց կարող է լինել»:
Պատասխանը կարծես թե չբավարարեց ազատանցիներին, կանանցից մեկը համառորեն շարունակեց. «Գոնե դուք ու կոմունիստական կուսակցությունը միավորվեք»: «Կմիավորվենք, եթե պառլամենտում երկուսս էլ հայտվենք, բայց հարցը նրանում է , որ էդքան մենք նույնը չենք, որովհետև նրանք չեն կարող ձերբազատվել հին, հնամաշ բաներից»,-պատասխանեց պարոն Սարգսյանը:
Եվ երբ նա սկսեց քննադատել այսօրվա համակարգը` նշելով, որ նորածին երեխայից սկսած 1500 դոլար պարտք ունեն, քանի որ երկրի իշխանությունները 4 միլիարդ դոլարի վարկ են վերցրել արտերկրից, զրուցակից պապիկներից մեկը հուզվեց. «Ներողություն, հարգելի Սարգսյան, լավ օր չտեսնի էն Հրանտ Բագրատյանը. երբ որ վարչապետը էր , թալանի տվեց էս ռայոնը, ես ճշմարտությունն եմ ասում, էնքան անարխիստ մարդ էր, որ Լեննագանից բռնացրած մենք ջրագիծ ունեինք, մինչև սահման էր հասնում, մեծ հարստություն էր, բոլոր տռուբեքը քանդեց, անցրեց արտասահաման»: Ի պատասխան պապիկի, Արամ Սարգսյանը հավելեց. «Բա հիմա չե՞ք լսում ինչեր է խոսում, սուրբ է դարձել»:
Այնուհետ Դեմկուսի առաջնորդն ասաց, որ վերջին 20 տարում իշխանության գլուխ կանգնած մարդիկ բոլորն էլ նույնն են, և եթե մեկը մյուսի հետ կռիվ է տալիս, իշխանությունն ամբողջական մեկի ձեռքը վերցնելու համար է: «Գիտեք գաղափարական կռիվ ունե՞ն, մեկը մյուսին չի՞ հավատում, ուզո՞ւմ է ավելի լավ գաղափարախոսություն բերի: Գալիս ձեզ ասում են՝ իշխանություն պիտի փոխվի, իշխանություն փոխելով չէ, իշխանության գաղափարախոսությունը պետք է փոխվի, 3 նախագահ ունեցել ենք, 3-ն էլ նույն քաղաքական գիծն են տարել, մեկը հիմքն է դրել էս ամեն ինչի, մյուսը ծաղկացրել է, մյուսն էլ փորձում է ինչ-որ բաներ անի, ոնց որ թե կիսատ-պռատ քայլեր են», -ասաց Դեմկուսի ղեկավարը:
Կարդացեք նաև
Ի դեպ, Արամ Սարգսյանի Ազատան կատարած այցի ժամանակ եռուզեռ էր գյուղում: Այնտեղ, որտեղ նստած էր Դեմկուսի ղեկավարը իր ութ տարեց զրուցակիցների հետ, 1-2 մետր հեռավորության վրա գյուղացիները հավաքվել, լվանում էին զոհվածների հիշատակին նվիրված արձանը, ասֆալտապատում էին Ազատանի փողոցները, պարզվեց այս ամենը երկրի նախագահի պատվին է. նա կիրակի հյուրընկալվելու է այս գյուղում:
Նունե ԱՐԵՎՇԱՏՅԱՆ
